सप्तरी। प्रेममा फसाइ एक बालिकालाई गर्भवती बनाएर युवक फरार भएका छन्। घटना सप्तरी जिल्लाकै हो। जिल्लाको छिन्नमस्ता गाउँपालिका वडा नम्बर ७ हाटी निवासी बालिकाको १४ बर्षको बालिकालाई गर्भवती बनाएर युवक फरार भएपछि बच्चा जन्मिएपछि आमा र बच्चा बिचल्लीमा परेका छन्।
छिमेकी रामअवतार मण्डलका २२ बर्षीय छोरा प्रमोदले माया, प्रेमको जालमा पारी गर्भवती बनाएको सोमबार बालिकाले राजविराजमा पत्रकारहरु जानकारी दिएकी छिन्। आफ्ना वृद्ध आमाबुवासँगै सोमबार विहान नेपाल पत्रकार महासंघ सप्तरी आएकी बालिकाले घरमा कामका लागि राखेर आफ्नो यौन शोषण गरेको बताइन्।
ज्याला दिने भन्दै छिमेकी रामअवतार मंडलले घरमा काम गर्न राखेको बालिकाको आरोप रहेको छ । त्यहीं क्रममा रामअवतारका छोरा प्रमोदले माया, प्रेमको जालमा पारी यौन शोषण गरेको बालिकाको भनाइ छ।
प्रमोदको गर्भ बोकेपछि विवाह गर्ने लोभ देखाएर १५ दिन युवक र उनका परिवारले स्वीकार गरेर घरमा पनि राखेको जानकारी दिदै उनले भनिन्, ‘घरमा राख्ने क्रममा गालीगलौज र कुटपिट गरेर घरबाट निकाल्यो।
काखे छोरीसहित पत्रकार समक्ष उपस्थित भएकी बालिकाले आफूलाई घरबाट निकाला गरेपछि प्रमोद पनि गाउँबाट फरार रहेको आरोप लगाइन्। यस बिषयमा प्रहरीमा पनि उजुरी दिएको बालिकाले बताइन्।
बालिका सहित उनका परिवारले न्याय दिलाइदिन सबै समक्ष आग्रह गरेका छन् । न्याय नपाए आफ्नै शरीरमा आगो लगाएर ज्यान दिने बालिकाकी आमाले पत्रकार सम्मेलनमा बताइन्।
