बारको कलैया स्थित रामराजा मोहन विक्रम शाह बहुमुखी क्याम्पसका तत्कालिन क्याम्पस प्रमुख हरिभुषण कुशवाहाको हत्या आरोपी पक्राउ परेका छन् । पक्राउ पर्नेमा बारा आदर्शकोतवाल गाउपालिका २ का ४१ वर्षीय सुरेन्द्र प्रसाद कुशवाहा छन् । उनी सेनाका भगौडा तथा गाँऊघरमा सबैलाई त्रसित बनाउने पृष्ठभूमि भएको प्रहरीले जनाएको छ ।
घटना पश्चात फरा रहेका सरेन्द्रलाई प्रहरीले मोरङ्गबाट पक्राउ गरेर बारा प्रहरीले ल्याएको छ । बाराबाट खटिएको बिशेष टोलीले उनलाई बुधबार पक्राउ गरेर बारा ल्याएको बाराका प्रहरी प्रवक्ता डिएसपी प्रकाश सापकोटाले जानकारी दिए ।
क्याम्पस प्रमुख कुशवाहाको २ जेठ २०८२ साँझ आदर्शकोतवाल गाउपालिका २ खजुरीया भन्ने ठाउँबाट कलैया तर्फ आउँदै गर्दा गोली प्रहार गरी हत्या भएको थियो । प्रहरीका अनुसार मृत्यु अघि पनि प्रमुख कुशवाहाले सुरेन्द्रले आफूमाथि सुरेन्द्रले गोली प्रहार गरेको खुलाएका थिए ।
सुरेन्द्र घटना पश्चात फरार रहेर भारतका विभिन्न स्थानमा लुकेर बस्दै आएका थिए । प्रहरीको अनुसन्धानमा हत्या घटनामा सुरेन्द्रसहित १७ जनाको संलगता रहेको खुलेको थियो ।
अनुसन्धानको क्रममा तत्कालै पक्राउ परेका चन्द्रमणी प्रसाद कुशवाहा, चाँदशी प्रसाद कुशवाहा, सुमेद कुमार कुश्वाहा, विनोद राउत कुर्मी, राधेश कुमार पटेल, अबधलाल कुशवाहा, चुल्हाई भन्ने श्रबण कुमार साह, हरिन्दर महरा चमार, ब्रहमदेव राम, मोतीलाल चौधरी मध्ये राधेस कुमार पटेल र विनोद राउत कुर्मी कर्तव्यज्या मुद्दामा जिल्ला अदालत बाराबाट धरौटीमा छुटेका छन् भने ८ जना पुर्पक्षको लागि कारागार चलान भएका छन् ।
उक्त घटनामा प्रयोग भएको हतियार पेस्तोल थान–२, गोली थान– ७ राउण्ड, मोटरसाईकल थान ४, मोबाईल थान– ४ थान, ल्यापटप थान– २, सिम कार्ड थान– ७ बरामद भएको थियो ।
पक्राउ परेका सुरेन्द्रमाथि ज्यान सम्बन्धि र हातहतियार खरखजना सम्बन्धि कसुरमा मुद्दा दर्ता भई प्रारम्भिक सुनुवाई समेत पुरा भएको डिएसपी सापकोटाले जानकारी दिए ।
