चिनियाँ विस्तारवाद र जिहादी अतिवादको विरुद्ध अभियान चलाउँदै संघीय हिन्दु गणतान्त्रिक देश स्थापनाका लागि कार्य गर्दै आएको “राष्ट्रिय एकता अभियान” ले पूर्व जिल्ला विकास समिति सर्लाहीका सभापति तेजनारायण यादवको अध्यक्षतामा एक कार्यक्रमका बीच “राष्ट्रिय एकता अभियान, सर्लाही” को जिल्ला तदर्थ समिती गठन गरिएको छ ।
अभियानका संरक्षक पूर्व मंत्री रामचंद्र राय,केंद्रीय अध्यक्ष विनय यादव ऱ केंद्रीय सदस्य जीतेन्द्र दास लगायतका अभियन्ताको उपस्थितिमा भएको भेलाले गठन गरेको ११सदस्यीय तदर्थ समितिको सचिवमा चन्दन सिंह, कोषाध्यक्षमा भगवान मिश्रलाई चयन गरिएको छ भने सदस्यमा सुरेश महतो सूडी,वीरेन्द्र यादव,राजगीर महतो, लालबाबु राय,रामवीर राय रहनु भएको छ ।
कार्यक्रममा वक्ताहरुले वर्तमानमा शासन सत्तामा रहेकाहरुको कर्तूतको कारण नेपाल आमाका सपुतहरुको संघर्ष र बलिदानले ल्याइएको संघीयता र गणतन्त्र बदनाम भइरहेकोले परिवर्तनकारी शक्तिहरू बेलामै सचेत भई अधिकांश नेपालीहरुको चाहना अनुसार नेपाललाई “संघीय हिन्दु गणतन्त्र नेपाल” घोषणामा विलम्ब गर्न नहुने बताउनु भएको थियो । वक्ताहरुले संघीयता र गणतन्त्र प्रणालीलाई सुदृढ बनाउँदै राष्ट्रलाई बलियो बनाउन आम नागरिकलाई “राष्ट्रिय एकता अभियान” मा गोलवन्द हुन समेत आग्रह गर्नुभएको थियो ।
