नयाँ दिल्ली । नेपाली कांग्रेसका नेता विमलेन्द्र निधि यतिबेला दिल्लीमा छन् । दिवंगत भारतीय नेता डीपी त्रिपाठीको स्मरणमा लेखिएका पुस्तकको विमोचन समारोहमा प्रमुख अतिथिका रुपमा आमन्त्रित निधिले त्यसबाहेक पनि केही राजनीतिक भेटघाट समेत गरेका छन् ।
नेपाली नेताहरुका मित्र तथा नेपाली लोकतन्त्रका शुभचिन्तकका रुपमा समेत चिनिएका त्रिपाठीको तीन वर्ष अगाडि निधन भएको थियो । त्रिपाठी राष्ट्रिय कांग्रेस पार्टीका महासचिव तथा राज्यसभा सदस्य थिए ।
शुक्रबार इन्डिया इन्टरनेसल सेन्टरको भरिभराउ सभा कक्षमा त्रिपाठीलाई स्मरण गर्दै निधि केहीबेर भावुक समेत बनेका थिए । ‘दिल्लीमा उहाँ(त्रिपाठी)ले आफ्नो निवासमा एउटा कोठालाई नेपाल कक्षकै नाम दिएका थिए, हामी उहाँलाई भेट्न पुग्दा यो तपाईंहरुकै लागि हो, कुनै साइनबोर्ड त झुन्ड्याइएको थिएन । नेपालीहरुका लागि त्यो कक्ष सदैव स्वागतका लागि तयार रहन्थ्यो,’ उनले भने, ‘त्यसले पनि नेपाल र नेपालीप्रति उनमा रहेको अथाह स्नेह देखिन्थ्यो ।’ निधिले सुनाए– नेपालमा लोकतन्त्र स्थापनाका लागि संघर्षरत नेपाली राजनीतिक दल र नेतालाई उनको साथ नै उनीसँगै विशेष सम्बन्ध हुनुको कारण थियो । नेपाली जनतालाई अधिकार, सम्मान र लोकतान्त्रिक वातावरण दिलाउन भारतको समर्थन प्राप्तीमा उनको सधैं सहयोग प्राप्त भएको निधिले उल्लेख गरे ।
‘बिना कुनै सन्देह नेपालको लोकतन्त्रलाई भारतको समर्थन रहँदै आएको छ, त्यसमा त्रिपाठीजीका पनि महत्त्वपूर्ण योगदान छ,’ निधिले भने, ‘नेपालमा लोकतन्त्र स्थापनाका लागि भारतीय शुभचिन्तकहरुको साथ मात्रै पाइएको छैन । त्यस्तो सहयोग दुईतर्फी भएको छ । हाम्रा नेताहरु पनि भारतमा भएको स्वतन्त्रताको लडाइँमा सहभागी थिए । जेलमा समेत बसेका थिए ।’
जनता दल युनाइटेटका महासचिव केसी त्यागीले भारतभित्र मात्रै होइन, बाहिरका देशमा पनि त्रिपाठीको मित्रता प्रगाढ रहेको र त्यसको उदाहरण नेपाल रहेको उल्लेख गरेका थिए । ‘नेपालमा एकैसाथ कांग्रेस र कम्युनिष्ट सबै दलका नेतासँग उहाँको एकै खाले राम्रो सम्बन्ध थियो,’ त्यगाीले भने, ‘अहिले त्रिपाठीजी भएको भए सायद प्रचण्डको शपथ ग्रहण समारोहमा पुग्थे र बेलुका देउवाजीको डिनर खान्थे । उहाँको नेपाली नेताहरुसँग त्यस्तो समानान्तर सम्बन्ध थियो ।’
त्रिपाठीको जीवनमा आधारित पुस्तकको विमोचन समारोहमा नेपालसँग उनको सम्बन्ध पनि चर्चामा रह्यो । कार्यक्रममा विभिन्न दलका राजनीतिज्ञहरुले त्रिपाठीको स्मरण गर्दै श्रद्धासुमन अर्पण गरेका थिए । राष्ट्रिय कांग्रेसका नेता पूर्वमन्त्री प्रफुल पटेल, सुप्रिया सुले, आम आदमी पार्टीका नेता एंव राज्यसभा सदस्य सञ्जय सिंह लगायतकाले त्रिपाठीको विद्ववता र समन्वयकारी भूमिकाको चर्चा गरेका थिए । (फाइल तस्बिर)
