जनकपुर । मधेश प्रदेशमा दुईजना राष्ट्रिय सभा सदस्यको लागि मतदान सुरु भएको छ।
जनकपुरधामको महेन्द्रनारायण सांस्कृतिक प्रतिष्ठान भवनमा बिहान ९ बजेदेखि मतदान सुरु भएको मतदान अधिकृत पुष्पा झाले जानकारी दिइन्।
राष्ट्रिय सभा निर्वाचनका लागि सत्ता घटक पाँच दलको गठबन्धन छ भने नेकपा एमाले र लोकतान्त्रिक समाजवादी (लोसपा) को छुट्टै गठबन्धन गठबन्धन छ।
यो प्रदेशमा एकजना अन्य र महिला तर्फको गरी दुईजना पदको लागि निर्वाचन हुँदै छ।
पाँचदलीय गठबन्धनबाट माओवादी केन्द्रकी उर्मिला अर्याल र जसपाका महमद खालिदको उम्मेदवार छन् । यस्तै एमाले लोसपा गठबन्धनबाट अन्यतर्फ एमालेका उसमान अन्सारी र महिलातर्फ लोसपाकी रुपा यादव उम्मेदवार छन्।
गठबन्धन गर्ने बेला एमालेबाट महिला तर्फ उम्मेदवारी दिएकी एमालेकी विना देवी साहले उम्मदेवारी फिर्ता लिएकी छन्।
मधेश प्रदेशबाट शशिकला दाहाल र सुमनराज प्याकुरेलको कार्यकाल आगामी फागुन २० गते सकिँदै छ।
यो प्रदेशमा १ सय ४ प्रदेशसभा सदस्य छन् । जसमा जसपा ३९, लोसपा १६, एमाले ८, कांग्रेस १९, एकीकृत समाजवादी १३, माओवादी ८ र नेपाल संघीय समाजवादी पार्टी १ छन्।
मधेसमा प्रदेश सभा सदस्यको मतभारअनुसार एमालेसँग मात्रै ३ सय ८४ मात्र छ।
यहाँ गाउँपालिका अध्यक्ष, उपाध्यक्ष र नगरपालिका प्रमुख, उपप्रमुख २ सय ६८ जना छन्। जसअनुसार प्रदेश २ मा कुल मतभार ९ हजार ८ सय १६ छ।
बाहिर तनाव
महेन्द्रनारायण निधि सांस्कृतिक प्रतिष्ठान भित्र राष्ट्रियसभाको मतदान भइरहदा बाहिर भने तनाव छ ।
सिके राउत नेतृत्वको जनमत पार्टीले बिहानैदेखि मतदान स्थल अगाडी पहिले किसानलाई मल देउ, र त्यसपछि मतदान गर भन्दै प्रदेर्शन गरिरहेका छन् ।
सोहि क्रममा जनमतका कार्यकर्ता भाटासहित मतदानस्थल भित्र प्रवेश गर्न खोज्दा झडप भएको छ । सो क्रममा ६ सेल अश्रुग्या प्रहरीले प्रहार गरेको धनुषाका प्रहरी उपरीक्षक (एसपी) बसन्त रजौरेले जानकारी दिए । अहिले पनि मतदान स्थल परवपरको अवस्था जनमत पार्टीको प्रदर्शनले तनावग्रस्त बनेको छ ।
त्यहाँको सुरक्षा व्यवस्था अहिले कडा पारिएको छ । बाक्लो संख्यामा नेपाल र सशस्त्र प्रहरी परिचालन गरिएको छ ।
