चौतारा : सिन्धुपाल्चोकको जुगल गाँउपालिका–२, लिदीका पहिरो पीडितहरुले सरकारसँग जिविकोपार्जन सहितको स्थानान्तरण माग गरेका छन् । स्थानीय सरकारले उनीहरुलाई अस्थायी आवासको लागि जुगल–१ कै बाँसखर्कमा सार्ने निर्णय भएपछि स्थानीयले सो माग राखेका हुन् ।
पहिरोमा परेकामध्ये २९ परिवारको लागि अहिले सेलाङको बाँसखर्कमा अस्थायी बासको लागि टहराहरु निर्माण भइरहेको छ । पहिरोले बस्ती नै जोखीम भएपछि उनीहरु सुरक्षीत स्थानमा बास खोजीरहेका छन् । १७२ परिवार रहेको लिदिका स्थानीयहरुले आफुहरुलाई खेतीयोग्य जग्गा सहित स्थानान्तरण गरिनुपर्ने माग राखेका छन् । आफ्नो नाममा लिदीमा रहेको सबै जग्गा सरकारलाई दिन आफुहरु तयार रहेको र आफुहरुलाई सोही बराबर जमीन दिन सरकारलाई माग गरेका छन् ।
पीडितहरुको व्यवस्थापनको लागि निर्माण गरिएको संयोजन समितीका संयोजक रेशम दोङले आफुहरुलाई सरकारको जमीन एक इन्च पनि वढी नचाएकोे आफ्नो जमिन सरकारलाई दिदै सोही बराबरको जमिन सरकारले दिनुपर्ने माग राख्नु भयो । ‘हामीलाई सरकारको एक टुक्रा पनि वढी जमिन चाहीदैंन’ संयोजक रेशम दोङले भन्नुभयो– ‘हाम्रो लालपुर्जामा भएजति खेतीयोग्य जमिन सरकारले हामीलाई उपलब्ध गरओस् र हामीलाई सुरक्षीत घर बनाइदिनुप¥यो ।’ सेलाङमा बस्ती बसाल्दा आफुहरुको पुखौंदेखिको थातथलो छोड्नु पर्दा यसले पनि मानसीक पिडा हुने भएकोले यदि सरकारले जमिन दिन सक्दैन भने नजिकै स्थानान्तरण गरिदिए पनि हुने उहाँले सुझाउनु भयो । अहिलेको लिदी बस्तीको केही माथी ब्रम्हचेत भन्ने खुला स्थान रहेको र सो स्थानमा स्थानान्तरण गराएमा अहिलेकै स्थानमा खेतीपाती गर्न सकिने भएकोले त्यसको बारेका पनि सोच्न उहाँले गाँउपालिकालाई सुझाउनु भयो ।
बस्ती विस्थापीत भएपछि आफुहरुलाई अन्यत्र स्थानान्तरण गर्न पीडितहरुले सरकारसँग माग गरेका छन् । सबैजना छिमेकीहरु एकैठाँउमा बस्न आफुहरु तयार रहेको तर सरकारले सुरक्षीत स्थानको खोजी गरि जग्गाधनी पुर्जा सहित आफुहरुको स्थायी बासस्थानको व्यवस्था गरिनुपर्ने उनीहरुले बताउँदै आएका छन् । लिदी शैक्षिक तथा आर्थीक रुपले पिछडीएको बस्ती हो । यहाँ उच्च शिक्षा हाँसिल गरेका व्यक्तिको संख्या एकदमै कमि छ । अन्य रोजगारीको कुनै संभावना नभएकोले कृषी नै उनीहरुको आयस्रोतको प्रमुख माध्यम हो । त्यसैले पनि खेतीयोग्य जमिन उनीहरुले माग गरेका हुन् ।
पहिरोबाट आफ्नो अभिभावक सहित घर समेत गुमाएपछि बालबालीकाहरुलाई पढ्न तथा बासस्थानमा समस्या भइरहेको छ । आफुहरुलाई पढ्न मन लागेपनि अब समस्या भएको उनीहरुको गुनासो छ । विभिन्न समस्याका विच आफुहरु गुर्जीरहेको अवस्थामा सबै न्युनतम सुविधा भएको स्थानमा आफुहरुको व्यवस्थापन गरिनुपर्ने उनीहरुको माग छ ।
पुस्तौपुस्तासम्म सडक र विजुली नपुगेको सो बस्तीमा गत हिँउदमा मात्रै एकैसाथ दुवै सुविधा प्राप्त भएको थियो । तर प्राप्त सुविधाको एक वर्ष पनि उपभोग गर्न नपाँउदै बस्ती सार्नुपर्ने अवस्था आउनु दुखद हो । उनीहरुलाई विकासका आधारभुत सुविधा सहित सुरक्षीत स्थानमा स्थानान्तरण गर्नु आजको प्रमुख आवश्यकता हो । ehimalayatimes
