चितवन । नेपाली कांग्रेसमा सभापति शेरबहादुर देउवा र वरिष्ठ नेता रामचन्द्र पौडेलबीच देखिएको मतभेद संसद पुनर्स्थापनापछि पनि रोकिएको छैन ।
प्रधानमन्त्री केपी शर्मा ओलीले संसद भंग गरेपछि देउवा मध्यावधि चुनावको पक्षमा उभिएका थिए भने पौडेलले संसद पुनर्स्थापनाका लागि आन्दोलनमा जोड दिए । सर्वोच्च अदालतको आदेशले संसद पुनर्स्थापना भएपछि देउवा र पौडेलबीच नयाँ सरकार गठनलाई लिएर विवाद सुरु भएको छ ।
बुधबार पूर्वसांसद स्वर्गीय एकनाथ रानाभाटप्रति श्रद्धाञ्जली दिन आयोजित सभामा पनि बुधबार दुई नेता फरकफरक दृष्णिकोण मात्र सार्वजनिक गरेनन्, व्यक्तिगत घोचपेच गरे ।
सभामा कांग्रेस चितवनका सभापति जीतनारायण श्रेष्ठको बायाँ रामचन्द्र पौडेल र दायाँ शेरबहादुर देउवा बसेका थिए । देउवाको छेउमा पार्टी महामन्त्री शशांक कोइराला थिए । भरतपुर विमानस्थलमा पत्रकारहरुसँग कुरा गर्दै प्रचण्ड–माधव समूहसँग मिलेर सरकार बनाउनुपर्ने धारणा राखेका महामन्त्री कोइरालाले श्रद्धाञ्जली कार्यक्रममा कुनै राजनीतिक टिप्पणी गरेनन् ।
तर देउवा र पौडेलले हुन त राजनीतिक भाषण गर्ने कार्यक्रम होइन भन्दै जमेर एक अर्काको आलोचना गरे ।
सभापतिभन्दा पहिला बोलेका वरिष्ठ नेता पौडेलले कांग्रेसले जनताबाट विपक्षमा बस्ने जिम्मेवारी पाएको र त्यही भूमिकालाई जिम्मेवारीपूर्वक निभाउनुपर्ने बताए । देउवाप्रति लक्षित गर्दै भने, ‘आफ्नो औकात र हैसियतभन्दा बढी आकांक्षा राख्नु महत्वाकांक्षा र विकृति हो, हैसियतभन्दा बढी आकांक्षा राख्न हुँदैन ।’
उनले अघि भने, ‘अहिले कांग्रेस प्रतिपक्षमा छ, संख्या पनि सानो छ । जुन हैसियतमा संसदमा छ, सोही अनुसारको भूमिका खेल्नुपर्छ, विपक्षीको सही भूमिका निर्वाह गर्नुपर्छ ।’ पौडेलले यसो भनिरहँदा सभापति देउवाले यताउता टाउको घुमाइरहे ।
त्यसपछि प्रमुख अतिथिका रुपमा सम्बोधन गरेका देउवाले सुरुमै पौडेललाई जवाफ दिए । ‘हुन त यो राजनीतिक कुरा गर्ने ठाउँ होइन, रामचन्द्रजी बोलिहाल्नुभयो’ भन्दै उनले पौडेललाई सानो चित्त भएको मान्छे भने । देउवाले अगाडि भने, ‘सानो चित्त नगर्नुस् रामचन्द्रजी । तपाईं विशाल हृदय राख्नुस् ।’
प्रतिपक्षमै बस्नुपर्छ भन्ने वरिष्ठ नेताको आशय व्यक्त गरेको भन्दै उनले पदको लोभ नभएको, जिम्मेवारी आए नभाग्ने बताए ।
प्रधानमन्त्री पाऊँ भनेर कतै नगएको स्भन्दै उनले अफर आए नभाग्ने बताए । सभापति देउवाले अघि भने, ‘प्रधानमन्त्री भएपनि कांग्रेसबाट नै हुने हो, पार्टीलाई फाइदा नै होला ।’ देउवाले कटाक्ष गरिरहँदा वरिष्ठ नेता पौडेल भने उनलाई हेर्दै मुसुमुसु हाँसिरहे ।
कांग्रेस चितवनका सभापति श्रेष्ठ भने पार्टी शीर्ष नेताहरुले सार्वजनिक कार्यक्रममा एकले अर्कोलाई गर्ने टिप्पणी र आरोपले पार्टीलाई फाइदा नगर्ने बताउँछन् । आन्तरिक वैठकमा छलफल, विवाद, मतमतान्तर, आरोप प्रत्यारोप भएपनि सार्वजनिक कार्यक्रममा भने नेताहरु मर्यादित र संयमित भएर प्रस्तुत नहुँदा आम कार्यकर्तामा निराशा छाउने सभापति श्रेष्ठले बताए ।
