सर्लाही । नेकपा अध्यक्षद्वय तथा पुर्व प्रधानमन्त्री पुष्पकमल दहाल ‘प्रचण्ड’ र माधवकुमार नेपालको नेकपाका सर्लाही जिल्ला इन्चार्ज डाचाराज वाग्लेको मृत्यु घटना शंकास्पद रहेको बताएका छन् ।
प्रधानमन्त्री केपी शर्मा अाेलीकाे निरंकुशतन्त्र र तानाशाही प्रतीगमनकाे बिराेधमा आन्दोलन गर्ने क्रममा वाग्लेको शंकास्पद मृत्यु भएकाले उच्चस्तरीय छानबिन गर्नु पर्ने नेता द्वयले बताएका हुन् ।
गत माघ २१ गते सर्लाहीको बरहथवा नगरपालिकामा नेकपाले आयोजना गरेको मसाल जुलुस सम्पन्न गरि बागमती फर्किने क्रममा नेकपा सर्लाही इन्चार्ज एवं केन्द्रीय सदस्य वाग्लेको मोटरसाइकल दुर्घटनामा शंकास्पद मृत्युु भएको थियो ।
नेता वाग्लेको तेह्रौं पुण्यतिथिको अवसरमा आयोजित श्रद्धाञ्जली सभालाई सम्बोधन गर्दै नेता द्वय
प्रचण्ड र नेपालले मृत्यु घटनाको सत्य तथ्य छानबिन हुनुपर्ने माग गरेका हुन् ।
सर्लाहीको हरिपुर नगरपालिका-१ जानकीनगर स्थित हजारविगाहमा अायोजित श्रद्धाञ्जली सभामा नेता प्रचण्डले अाेलीकाे निरंकुशतन्त्र र तानाशाही प्रतीगमनकाे विराेधमा वाग्लेले ज्यानको अाहुती दिनु परेकाे बताउँदै अब अझ सशक्त रूपमा निरंकुशता विरुद्ध याे अान्दोलनलाई अगाडि बढाउन सम्पूर्ण लाेकतन्त्रका पक्षधर शक्तिहरू एकजुट हुनुपर्ने आव्हान गरेका छन् ।
नेकपाका अर्का अध्यक्ष तथा पूर्व प्रधानमन्त्री माधवकुमार नेपालले पनि प्रहरीले भने जस्तो सामान्य सडक दुर्घटनाको कारणले मात्रै वाग्लेको मृत्यु नभएको बताए। ‘मोटरसाइकल कुनै जनावरसँग ठोक्किएर वा आफैँ अनियन्त्रित भएर दुर्घटना भएको भनेर पत्याउन सक्ने अवस्था छैन,’ नेपालले भने, ‘घटना रहस्यमय छ। सरकारले विशेषज्ञ टोली गठन गरेर गम्भीरतापूर्वक छानविन गर्नुपर्छ।’
श्रद्वाञ्जली सभाको आयोजना हुने दिनलाई मध्यनजर गर्दै सर्लाहीका हरिपुर , बरहथवा र बागमती नगरपालिकाले तहले(आज) बिहीबार सार्वजनिक बिदा समेत दिएका छन् ।
स्व. वाग्लेले जिल्लाका लागि पुर्याएको योगदानको कदर गर्दै सार्वजनिक बिदा दिएको पालिकाका प्रमुखहरुले बताएका छन् ।
हरिपुर नपा को जानकीनगर घर भएका वाग्ले गत माघ २१ गते राति बरहथवा नगरपालिका- ९ स्थित नयाँरोड-बरहथवा सडकखण्ड अन्तर्गत मूर्तिया जंगलमा रहस्यमय मोटरसाइकल दुर्घटनामा मृत फेला परेका थिए ।
श्रद्धाञ्जली सभामा स्व नेता वाग्लेका परिवारका सदस्यहरु सहित पुर्व मन्त्री , निवर्तमान सांसद ,प्रदेश सांसद ,पार्टीका केन्द्रीय कमिटी ,स्थायी कमिटी सदस्य ,स्थानीय तहका प्रमुख ,उपप्रमुख लगायत पार्टीका स्थानीय नेता तथा कार्यकर्ताहरुको बाक्लो उपस्थिति रहेको थियो ।
