कोभिड–१९ विरुद्धको खोप अभियानअन्तर्गत दोस्रो दिन झन्डै २९ हजारभन्दा बढीले खोप लगाएका छन् । बुधबारदेखि ७७ वटै जिल्लामा खोप अभियान सुरु भएको थियो । ‘खोपको अद्यावधिक विवरण आइरहेको छ, बिहीबार साँझसम्म २९ हजारभन्दा बढीले खोप लगाएका छन्,’ स्वास्थ्य सेवा विभागका खोप शाखा प्रमुख झलक गौतमले भने । साँझ ५ बजेसम्म २८ हजार ७३२ जनाले खोप लगाएका स्वास्थ्य तथा जनसंख्या मन्त्रालयले जनाएको छ ।
खोप प्राप्त गर्नेमध्ये प्रदेश १ का तीन हजार आठ सय ४७, प्रदेश २ का दुई हजार एक सय ७४, बागमतीका ११ हजार चार सय ६१, गण्डकीका चार हजार आठ सय ५३, लुम्बिनीका दुई हजार तीन सय तीन, कर्णालीका एक हजार ६ सय ७७ र सुदूरपश्चिम प्रदेशका दुई हजार चार सय १७ जना छन् ।
स्वास्थ्य मन्त्रालयका प्रवक्ता डा.जागेश्वर गौतमले खोप लगाएका व्यक्तिमध्ये कसैलाई पनि स्वास्थ्य समस्या नदेखिएको बताए । तर, देशैभरि करिब २० जनालाई सामान्य समस्या भने देखिएको छ ।
‘सामान्य ज्वरो आउने, टाउको दुख्ने, जिउ दुख्नेजस्ता समस्या आएको खबर आएको छ, तर कोही पनि सिकिस्त छैन, कोही पनि अस्पताल भर्ना भएका छैनन्, घरमै आराम गरिरहेका छन्,’ मन्त्रालयका डा.विकास देवकोटाले भने ।
मन्त्रालयले खोपका कारण बिरामी भएकाको गुनसो सुन्न देवकोटाको नेतृत्वमा छुट्टै टिम बनाएको छ । तर, अहिलेसम्म कुनै पनि रिपोर्टिङ नभएको उनले बताए । ‘दोस्रो दिन पनि उत्साहजनक सहभागिता छ, कसैले डराउनुपर्ने अवस्था छैन, ढुक्कले खोप लगाउन आग्रह गर्दछु,’ देवकोटाले भने ।
एक महिनापछि दोस्रो डोज
भारतले अनुदानमा १० लाख डोज खोप उपलब्ध गराएपछि सरकारले बुधबारदेखि देशैभरि करिब तीन सय खोप केन्द्रमार्फत पहिलो चरणमा प्राथमिकतामा परेका साढे चार लाखजनालाई खोप लगाउने अभियान थालेको हो ।
