काठमाण्डौ : नेपालको कञ्चनपुर र भारतको उत्तरप्रदेशको सीमा क्षेत्रमा सीमा मिचिएको भन्दै स्थानीयहरुले यसअघि विरोध गरेका थिए । तर, भारतीय पक्षले भने उक्त क्षेत्रमा उखु तस्करीलाई रोक्न चेकपोइन्ट स्थापना गरिएको स्पष्ट पारेको छ ।
भारतीय सशस्त्र सीमा बल एसएसबीले भारतको पिलभीत जिल्ला र कञ्चनपुरको बेलोरी र बेलडाँडी नगरपालिकाको सीमा जोडिएको क्षेत्रमा चेकपोइन्ट स्थापना गरिएको जनाएको छ । यस सीमा क्षेत्रमा स्थानीयहरुले उखु बाली बिक्रीका लागि लैजाने गरेका छन् । यो उखुको सिजन भएका कारण एसएसबीका अधिकारीहरूले भारतीय क्षेत्रमा सीमा छेउछाउको अस्थायी चेकपोइन्टहरु स्थापना गरेका छन् ।
पल्लभराज भट्टलगायतका स्थानी तथा स्थानीय मिडियाहरुले ती चौकीहरु ‘नो म्यान्स ल्यान्ड’ मा बनाइएको बताइरहेका छन् । उनीहरुले सामाजिक सञ्जालमा भारत र भारतीय एसएसबीविरोधी पोस्टहरु गरिरहेका छन् ।
एसएसबीका अधिकारीहरुले भने ती चौकीहरु ‘नो म्यान्स ल्यान्ड’ मा नभएको बताएका छन् । यस घटनाको बारेमा एसएसबी ४९ बटालियनले आफ्नो माथिल्लो निकायमा मौखिक रिपोर्ट गरिसकेको छ ।
भारतीय अधिकारीहरुले भनेका छन्, “उखुको तस्करी रोक्नका लागि अस्थायी चौकीहरु निर्माण गरिएका छन् । दशगजाको नजिकै रहेको चौकी राखिएको स्थान भारतमा पर्दछ र नेपाली अधिकारीहरूलाई यस विषयमा पूर्ण जानकारी छ ।”
राजनीतिक कारणले केही स्थानीयहरुले भारत विरोधी र एसएसबी विरोधी सन्देश पोस्ट गरिरहेको समेत भारतीय पक्षले जनाएको छ । भारतीय पक्षले भनेको छ, “तटबन्ध भारतीयतर्फ छ र भारतीय पक्षले नदी पार गरेको छैन । नदीको धारले हरेक वर्ष भूमिमा क्षति पुर्याएको छ र नेपाली पक्षले पनि आफ्नो छेउमा तटबन्ध निर्माण गर्नुपर्दछ अन्यथा स्वभाविकरुपमा बाढी आउँछ ।”
कुनै पनि नेपाली अधिकारीहरुले सीमा अतिक्रमण भएको विषयमा भारतीय पक्षलाई जानकारी गराएका नगरेको समेत भारतीय पक्षको दाबी छ ।
