काठमाडौं । गृहमन्त्री ओमप्रकाश अर्यालले जेनजी आन्दोलनमा ज्यान गुमाएका व्यक्तिहरूको सम्झनामा श्रद्धाञ्जली अर्पण गरेका छन्।
शनिबार साँझ बानेश्वरमा जेनजी शहीदको सम्झनामा दीप प्रज्ज्वलन कार्यक्रममा बोल्दै गृहमन्त्री अर्यालले जेनजी आन्दोलनमा सहभागी भई ज्यान गुमाएका साहसी योद्धा तथा अमर प्रहरीप्रति हार्दिक श्रद्धाञ्जली व्यक्त गरे।
उनले जेनजी विद्रोहले तत्कालीन शासकहरूको सत्ता खोसेको उल्लेख गर्दै अहिले देखिएको राजनीतिक परिवर्तनको जग पनि त्यही जनआन्दोलन रहेको बताए।
‘जेनजी विद्रोहले तत्कालिन शाषकहरुको सत्ता खोसेको थियो। र विद्रोहबाट खोसिएको सत्ता आज वैधानिकरुपमा पनि खोसिन गईरहेको छ। मत परिमाणले देखाएको छ। यसको जग जेनजी जनआन्दोलन हो,’ उनले भने।
गृहमन्त्री अर्यालले जेनजी आन्दोलनले उठाएका मागहरू आगामी सरकारले पूरा गर्ने विश्वास व्यक्त गरे। ती माग पूरा गराउन आफूहरू निरन्तर खबरदारी गर्ने उनको भनाइ थियो।
‘जेनजीले उठाएका मागहरु आउने सरकारले पूरा गर्नेछ र त्यो पूरा गराउनको लागि हामी खवरदारी गर्नेछौँ। हामी हिजो पनि सडकमा थियौं। कोही साथि आफ्नो जिम्मेवारी पूरा गर्न सरकारमा गए पनि फर्किएर सडकमा नै आउने हो। सडकबाट फेरी पनि सरकारलाई सहयोग पनि गर्छौँ र खवरदारी पनि गर्छाँै,’ उनले भने।
