जनकपुरधाम, असार ८ । मधेश प्रदेश मिडिया काउन्सिलका अध्यक्ष कमलकुमार उपाध्यायलाई विशेष अदालतले भ्रष्टाचारको मुद्दामा दोषी ठहर गर्दै ६ महिना कैद र १ लाख १७ हजार ५२० रुपैयाँ जरिवानाको फैसला सुनाएको छ।
विशेष अदालतका अध्यक्ष टेकनारायण कुँवर र न्यायाधीशद्वय रामबहादुर थापा तथा रितेन्द्र थापाको संयुक्त इजलासले उपाध्यायलाई दोषी ठहर गर्दै सजाय सुनाएको हो। अख्तियार दुरुपयोग अनुसन्धान आयोगले २०८२ साल वैशाख ९ गते उपाध्यायविरुद्ध मुद्दा दायर गरेको थियो। उक्त मुद्दा उनी रजिष्ट्रारको रूपमा नियुक्त भएको दोस्रो दिनमै दायर गरिएको थियो।
उपाध्यायमाथि बाराको पचरौता नगरपालिकाको दुई ठेक्काको टेण्डर सूचना राष्ट्रिय पत्रिकामा प्रकाशन गर्नुपर्नेमा, केवल एक प्रति मात्रै प्रिन्ट गराएर ३ लाख ५२ हजार ५६० रुपैयाँको खर्च देखाई भ्रष्टाचार गरेको आरोप लागेको थियो। सो कार्य उपाध्यायको स्वामित्वमा रहेको ‘केएस मल्टीपरपोज प्रालि’ मार्फत गरिएकाले सो कम्पनीलाई पनि १ लाख १७ हजार ५२० रुपैयाँ जरिवाना गर्ने फैसला गरिएको छ।
सार्वजनिक खरिद ऐनको उल्लंघन गर्दै नगरपालिकासँगको मिलेमतोमा यो कार्य भएको अदालतले ठहर गरेको छ। सोही मुद्दामा पचरौता नगरपालिकाका निमित्त प्रमुख प्रशासकीय अधिकृत श्यामप्रसाद यादवलाई पनि अदालतले ६ महिना कैद र बराबरको जरिवाना गर्ने निर्णय गरेको छ।
तर, लेखापाल हासिम मिया अन्सारीले प्रमुख प्रशासकीय अधिकृतको आदेशअनुसार मात्र भुक्तानी गरेको प्रमाणित भएपछि अदालतले उनलाई सफाइ दिएको छ।
कमलकुमार उपाध्याय नेपाल पत्रकार महासंघ बाराका पूर्वअध्यक्ष, प्रेस चौतारी नेपालका पूर्व सचिव तथा ‘कृपा दैनिक’का प्रकाशक तथा सम्पादक हुन्।
