जनकपुरमा छुरा प्रहार गरी युवकको हत्या

जनकपुरधाम । जनकपुरमा छुरा प्रहार गरी एक युवकको हत्या भएको छ । जनकपुरधाम उपमहानगरपालिका २३ बिन्धि बस्ने पप्पु यादवका १८ वर्षीय छोरा आशु यादवको हत्या भएको हो ।

उनको हत्या आरोपमा अर्का युवकलाई प्रहरीले छुरासहित पक्राउ गरेको छ ।
धनुषाका प्रहरी प्रवक्ता डिएसपी वरुणबहादुर सिंहका अनुसार शनिबार साँझ ५ बजेतिर होली खेल्ने क्रममा विवाद हुँदा स्थानीय लक्षमण महतोका छोरा २१ वर्षीय धर्मेन्द्र महतोले आँशुमाथि छुरा प्रहार गरेका थिए ।

छाती,ढाड र पेटमा छुरा प्रहारबाट गम्भीर घाइते आशुको उपचारको क्रममा प्रादेशिक अस्पताल जनकपुरमा साँझ करिब ६ बजे मृत्यु भएको हो ।

छुरा प्रहार गर्ने धर्मेन्द्रलाई छुरासहित तत्कालै पक्राउ गरी अनुसन्धान गरिरहेको जिल्ला प्रहरी कार्यालय धनुषाले जनाएको छ ।