काठमाडौं । नेकपा माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ले वर्तमान सरकार व्यवसायीको विरुद्धमा रहेको टिप्पणी गरेका छन्।
आज काठमाडौंमा आयोजित नेपाल राष्ट्रिय व्यवसायी महासंघको ७औं वार्षिक साधारणसभालाई सम्बोधन गर्दै उनले सरकारले व्यवसायीलाई सहुलियत दिएर अप्ठ्यारो अर्थतन्त्रलाई सहजीकरण गर्न नचाहेको बताए। ‘सहजीकरणभन्दा सरकारले व्यवसायीलाई निचोर्ने र दुहुने नीति लिएको प्रष्ट देखिन्छ,’ उनले भने।
देश आर्थिक रुपले अप्ठ्यारोमा रहेको अवस्थामा व्यवसायीलाई सहुलियत दिएर अर्थतन्त्र सहजीकरण गर्ने जिम्मेवारी राज्यको भएको उनको भनाइ छ। ‘सरकारले सहजीकरण गर्नुपर्नेमा व्यवसायीलाई निचोर्ने, दुहुने र त्यहीबाट आर्थिक समस्या हल गर्ने नीति लिएको छ। अहिले विदेशबाट पैसा (रेमिट्यान्स) आउन छाडेको, लगानी पनि नभित्रिएको र बैंकमा पैसा थुप्रिएको अवस्था छ। सरकारले व्यवसायका लागि उपयुक्त वातावरण बनाउनै चाहेको छैन,’ उनले भने।
राज्यले सोझा, सिधा, कमजोर र धेरै आम्दानी नहुने व्यवसायीको करमाथि कर थुपारेर त्यहीबाट समस्याको हल खोजेको उनको भनाइ छ। आफू राज्यको यस्तो नीतिको विरुद्धमा रहेको उनले प्रष्ट पारे।
