काठमाडौं । अमेरिकाका नवनिर्वाचित राष्ट्रपति डोनाल्ड ट्रम्पले पूर्व सांसद तुलसी गबार्डलाई राष्ट्रिय गुप्तचर विभागको निर्देशकमा नियुक्त गरेका छन् ।
ट्रम्पको घोषणा पछि तुलसीले एक्समा एक पोस्टमा लेखिन्, “धन्यवाद, डोनाल्ड ट्रम्प । अमेरिकी जनताको सुरक्षा र स्वतन्त्रताको रक्षा गर्न तपाईंको मन्त्रिपरिषद्को सदस्यको रूपमा सेवा गर्ने अवसरको लागि। म तपाईंसँग काम गर्न तत्पर छु। ”
तुलसीलाई यो जिम्मेवारी दिँदै डोनाल्ड ट्रम्पले भने, “मलाई यो घोषणा गर्न पाउँदा खुसी लागेको छ कि कांग्रेसकी पूर्व महिला सदस्य लेफ्टिनेन्ट कर्नल तुलसी गब्बार्डले राष्ट्रिय खुफिया (डीएनआई) निर्देशकको रूपमा काम गर्ने छिन्।”
तुलसी गबार्डले अमेरिकी सेनामा दुई दशकभन्दा बढी समय काम गरिसकेकी छिन्। तुलसीलाई इराक र कुवेतमा आर्मी नेशनल गार्डको रुपमा तैनाथ गरिएको थियो । उनले होमल्याण्ड सेक्युरिटी कमिटीमा पनि दुई वर्षभन्दा बढी समय सेवा गरिन् ।
तुलसीलाई उनको नामको कारणले प्रायः भारतीय मूलको मानिन्छ, तर उनको भारतसँग कुनै सम्बन्ध छैन। तुलसीका बुबा क्रिस्चियन र आमाले हिन्दू धर्म ग्रहण गरेकी थिइन् ।
