सप्तरी- सप्तरीको बोदेबरसाईनमा सार्वजनिक जग्गा बिक्री प्रकरणमा स्थानीयहरूको विरोध प्रदर्शन
सप्तरी जिल्लाको बोदेबरसाईन नगरपालिका वडा नम्बर ५ मा सार्वजनिक जग्गा बिक्री गरिएको आरोपमा स्थानीयवासीहरूले तीव्र विरोध प्रदर्शन गरेका छन्। स्थानीय मोहम्मद आसिकले १० लाख रुपैयाँमा ४ कठ्ठा सार्वजनिक जग्गा मोहम्मद इजराईल मार्फत बेचेको खबर फैलिनसाथ स्थानीयवासी आक्रोशित भएका हुन्।
उक्त जग्गा बिक्री प्रक्रियामा असहमति जनाउँदै स्थानीयवासीले विरोध प्रदर्शनमार्फत नगरपालिका र सम्बन्धित निकायलाई ध्यानाकर्षण गराएका छन्। विरोधको नेतृत्व मोहम्मद कलाम उदिनले गरेका थिए, जहाँ स्थानीयवासी सबिना खातुन, सहजना खातुन, जैतुन खातुन,सैफल खातुन, साबित्रा सदाय, सहिदा खातुन लगायत सयौं स्थानीयको उपस्थिति थियो।
प्रदर्शनका क्रममा उनीहरूले सार्वजनिक जग्गा संरक्षण र अनियमितता रोक्न स्थानीय सरकारलाई तत्काल कदम चाल्न माग गर्दै बजारभर नाराबाजी गरेका थिए। विरोधको क्रममा उनीहरूले नगरपालिकाका प्रमुख प्रशासनिक अधिकृत विष्णु यादवलाई ज्ञापनपत्र पनि बुझाए।
सार्वजनिक सम्पत्तिको संरक्षणमा सरकारको भूमिका कमजोर रहेकोप्रति स्थानीयहरू आक्रोशित छन्। उनीहरूको भनाइ अनुसार, सार्वजनिक जग्गा जोगाउन र संरक्षण गर्न स्थानीय सरकारले पहल नलिँदा निजी स्वार्थका लागि बिक्री हुने खतरा बढेको छ। प्रदर्शनकारीहरूको एकमात्र उद्देश्य यो प्रकरणमा सत्यतथ्य बाहिर ल्याउनु र भविष्यमा सार्वजनिक सम्पत्तिको संरक्षणमा सरकारलाई सजग गराउनु रहेको छ।
यता, जग्गा बिक्रीमा मुछिएका स्थानीय मो. करामतको छोरा जिकरुला मियाँसँग सम्पर्क गर्न खोज्दा फोनमा सम्पर्क हुन नसकेको जनाइएको छ।
