शिक्षक कक्षा कोठामै सुतेको पाइएपछि…

राजविराज । सप्तरीको एक विद्यालयमा शिक्षक कक्षा कोठामै सुतेको पाइएको छ । जिल्लाको विष्णुपुर गाउँपालिका स्थित आधारभूत विधालय सिम्राहा सिङ्यौन्का शिक्षक लालबहादुर यादव र कार्यालय सहयोगी रघुनाथ यादव कक्षा कोठामै किताबको सिरानी बनाएर सुतेको पाइएको हो । विष्णुपुर गापाका शिक्षा समिति सदस्य तथा वडा न १ को वडा अध्यक्ष बलराम यादव र शिक्षा संयोजक रामेन्द्रनाथ यादव समेतको टोलीले मंगलबार अनुगमन गर्दा यस्तो पाइएको पालिका अध्यक्ष उमेश यादवले जानकारी दिए ।
बिहान ११ :३० बजेको समयमा शिक्षक र कार्यालय सहयोगी सुतेको अवस्थाको फोटो अध्यक्ष यादवले नै सामाजिक संजालमा पोस्ट गरेका छन् ।
पालिका अध्यक्ष यादवका अनुसार जनता मावि खुरुहुरिया, आधारभूत विद्यालय मुसहर्निया र सिम्राहा सिङयौन विद्यालयको अनुगमन गरिएको हो ।
अनुगमनका क्रममा यी विद्यालयका केहि शिक्षक शिक्षिका अनुपस्थित रहेको पाइएको उनले बताए ।
‘यस्तै यस्तै अवस्था हेर्दा र शिक्षा को गुणस्तरीय शिक्षा को कुरा गर्दा विभिन्न बहानाबाजी गरि र केही राजनीतिक व्यक्तिहरुको समेत आडमा विभिन्न बहाना गरि आन्दोलनमा जान्छ’ अध्यक्ष यादवले सामाजिक संजालमा भनेका छन्, ‘प्रत्यक्ष प्रमाण सहित हेर्नुस् । शिक्षा यस्तो शक्तिशाली हतियार हो, जसको प्रयोगले संसार बदल्न सक्छौ। यस्तो अवस्थामा गुणस्तरीय शिक्षाको कल्पना गर्न सकिन्छ त ?’ egreenmadhesh