राजविराज । जुम्लामा स्वास्थ्य सेवा दिइरहेका एक चिकित्सक न्यायका लागि आफ्नो गृह जिल्ला सप्तरीमा विगत दुई महिनादेखि भौंतारिरहेका छन् ।
आमाको मृत्यु भएको २ महिना बित्दा समेत ठक्कर दिने सबारीसाधनको पहिचान हुन नसकेको डा. गुप्ताले बताए ।
कर्णाली स्वास्थ्य विज्ञान प्रतिष्ठानमा एशोसिएट प्राध्यापक एवं जनरल प्राक्टिस तथा आकस्मिक मेडिसिन विभागका प्रमुख रहेका डा. गुप्ता आमालाई ठक्कर दिने मोटरसाइकलको पहिचान हुन नसक्दा चिन्तित बनेका छन् ।
सबारीको ठक्करले नै आमाको मृत्यु भएको बताउँदै डा. गुप्ताले ठक्करले मस्तिष्कमा लागेको अति कड चोटका कारण मस्तिष्कको एउटा भाग नै ब्रष्ट भएको प्रष्ट रहेको अवस्थामा प्रहरी अहिलेसम्म ती सबारीको खोजी गर्न नसकेको उनको भनाई छ ।
प्रहरीलाई म आफैं प्रमाणसहित प्रत्यक्षदर्शीहरुको बयान दिन लगाएको बताउँदै डा. गुप्ताले मंगलबार राजविराजस्थित नेपाल पत्रकार महासंघमा पत्रकार सम्मेलन गर्दै भने, ‘तर, प्रहरी हालसम्म आफ्नो काम गर्न सकेको छैन् ।’
आफू दुई महिनादेखि काम छाडेर जिल्लामा बस्दै ठक्कर दिने सबारीको पहिचान गराउन लागिपरेपनि प्रहरी हालसम्म निष्कर्षमा पुग्न नसक्नु दुःखद भएको उनी बताउँछन् ।
घट्ना भएको समयमा इलाका प्रहरी कार्यालय कंचनपुरका निमित्त प्रमुख रहेका प्रहरी निरीक्षक अवधकिशोर ओझाले पट्क्कै ध्यान नदिएको उनले बताए ।
‘यसपछि नयाँ प्रहरी प्रमुखको रुपमा आएका डीएसपी महेन्द्र नेपालले पनि काम गरिरहेको मात्रै बताइरहेका छन्’ डा. गुप्ताले भने, ‘मुद्दा फाँटका सई रामपदार्थ साह पनि प्रत्यक्षदर्शीको बयान टिप्न मानेनन् । पछि आएका नयाँ अनुसन्धान अधिकृत प्रहरी निरीक्षक सुशान्त मिश्रले यो बयान टिप्न लगाए ।’
समग्रमा हेर्दा प्रहरीले नै घट्नालाई लुकाउन खोजेको उनको आरोप छ । ‘दुई महिना अनुसन्धान गरेको प्रहरीले अहिले आएर किटानी जाहेरी दिन मलाई भनिरहेको छ’ उनले भने, ‘म कसकोबिरुद्ध जाहेरी दिनु ? अनुसन्धान गरेर पहिल्याउने काम प्रहरीको होइन् ?’
गृहमन्त्रालयदेखि आफूले बुझेका हरेक निकायमा यो बिषयमा जानकारी गराउँदा समेत कतैबाट न्याय पाउन नसकेको उनले गुनासो गरे ।
‘के म न्याय पाउन सक्दिनँ ?, मेरो आमालाई कसले ठक्कर दिएर मारे ?’ मलिनो अनुहारमा उनले भने ।
डा. गुप्ताले न्याय दिलाइदिन संचारकर्मी, मानवअधिकारकर्मीसहित सबैसँग अनुरोध समेत गरेका छन् ।
प्रहरीले भने घट्नाको अनुसन्धान भइरहेको जनाएको छ । इलाका प्रहरी कार्यालय कंचनपुरका डीएसपी महेन्द्र नेपालले संकलन भएका सिसिटिभी फुटेजहरुको अध्ययन गरिरहेको जानकारी दिए ।
उनले प्रहरी आफ्नो काममा लागिपरेको बताए ।
