मधेश प्रदेशमा एन्टी रेविज भ्याक्सिनको चरम अभाव भएको छ । प्रादेशिक अस्पताल जनकपुर लगायत मधेश प्रदेशका सरकारी अस्पतालमा भ्याक्सिनको अभाव भएको हो । प्रादेशिक अस्पताल जनकपुरमा एकसातादेखि भ्याक्सिन नहुँदा दैनिक दर्जनौ बिरामी रित्तै फर्किने गरेका छन् । प्रादेशिक अस्पतालमा दैनिक कुकुकर, स्याल, बिरालो, बाँदर टोकेका सयजनाको हाराहारीमा बिरामी उपचारका लागि जाने गर्दछन् । भ्याक्सिन नहुँदा बिरामीलाई फर्काउन बाध्य भएको एआरभी शाखाकी फोकलपर्सन कविता चौधरीले बताइन् । एक व्यक्तिलाई एकसाता भित्र तीन डोज भ्याक्सिन लगाउने गरिन्छ ।
भ्याक्सिन प्रदेश स्वास्थ्य आपुर्ति व्यवस्थापन केन्द्र जनकपुरबाट प्रादेशिक अस्प्ताल जनकपुरसहित मधेश प्रदेशका सरकारी अस्पतालमा उपलब्ध गराउने गरिन्छ । तर प्रदेश आपुर्ति केन्द्रमा माग अनुसारको भ्याक्सिन करिब दुई महिनादेखि अभाव रहेको सूचना अधिकारी रामहृदय यादवले बताए ।
‘दुई महिनादेखि हामी माग अनुसारको भ्याक्सिन हामीले स्थाहरुलाई उपलब्ध गराउन सकेका छैनौ । संघ सरकारले न्युन संख्यामा मात्रै भ्याक्सिन उपलब्ध गराउँदा यस्तो परिस्थित आएको हो’ प्रदेश स्वास्थ्य आपुर्ति केन्द्रका सूचना अधिकारी यादव भन्छन् ।
संघ सरकारको स्वास्थ्य तथा जनसंख्या मन्त्रालयको स्वस्थ्य सेवा विभाग अन्तर्गतको स्वास्थ्य आपुर्ति शाखाले देशैभर एन्टी रेविज भ्याक्सिन उपलब्ध गराउने गरेको छ ।
सूचना अधिकारी यादवका अनुसार मधेश प्रदेशमा मासिक चार हजार भन्दा बढी एन्टी रेविज भ्याक्सिनको आवश्यक्ता छ । प्रादेशिक अस्पताल जनकपुरमै आर्थिक वर्ष २०७९।०८० देखि हालसम्म हालसम्म ३ हजार १८१ भ्याक्सिन बिरामीलाई लगाइएको छ । तर, स्वास्थ्य सेवा विभागले थोरै थोरै मात्रामा उपलब्ध गराउने गरेको छ । जसले अभावको सामना गर्नु परेको छ ।
स्वास्थ्य सेवा विभागको स्वास्थ्य आपुर्ति शाखाले केहीदिन प्रयोगशालामा परीक्षण गर्दा मात्र अभावको अवस्था रहेको जनाएको छ । अहिले सबैतिर भ्याक्सिन पठाइसकिएको शाखाका प्रमुख डा. सुरेन्द्र चौरसिया बताउँछन् ।
‘यो बीचमा भ्याक्सिन आइसकेको थियो । त्यसको औषधि टेष्टको लागि प्रयोगशालामा पठाएका थियौं । टेस्ट भइसक्यो । हामी पठाउन सुरु गरिसकेका छौं । पुगिसकेको होला वा बाटोमा होला’ शाखा प्रमुख चौरसिया भन्छन् ।
सरकारी हस्पिटलमा भ्याक्सिन अभावको कारण बिरामी फर्केर निजीबाट महगोमा किनेर लगाउन बाध्य छन् ।
