काठमाडौँ, भदौ ९ गते । लोकतान्त्रिक समाजवादी पार्टी (लोसपा) नेपालका अध्यक्ष महन्थ ठाकुरले मधेश आन्दोलनमा मारिएका पार्टी नेता, कार्यकर्ताहरूलाई अझै शहीद घोषणा नगरेकोभन्दै सरकारप्रति असन्तुष्टि व्यक्त गरेका छन् ।
पार्टी स्थापना दिवसको अवसरमा शनिबार पार्टीको केन्द्रीय कार्यालय बबरमहलमा आयोजित कार्यक्रमपछि उनले सञ्चारकर्मीसमक्ष मधेश आन्दोलनको क्रममा मारिएका पार्टीका नेता, कार्यकर्ताहरूलाई शहीद घोषणा समेत नगरेको भन्दै सरकारप्रति असन्तुष्टि व्यक्त गरेका हुन् ।
मधेश आन्दोलनको क्रममा जेल परेका र झुटा मुद्दा लगाइएकाहरूको मुद्दा फिर्ता लिने विगतमा गरिएको सम्झौता पनि तत्काल कार्यान्वयनमा ल्याउन अध्यक्ष ठाकुरले सरकारलाई सचेत गराए ।
उनले सरकारले सो मुद्दा फिर्ता लिने गरी कानुन निर्माणको काम अघि बढाएको जानकारी दिए पनि त्यस अनुसारको काम हुन नसकेको गुनासो समेत गरे ।
