काठमाडौँ–निर्वाचन परिणाम सार्वजनिक भएपछि दलहरुबीच सत्ता समीकरणबारे छलफल तीव्र भएको छ । यसै क्रममा नयाँ सरकार गठन र आगामी रणनीति तय गर्न नेकपा माओवादी केन्द्रका अध्यक्ष पुष्पकल दाहाल ‘प्रचण्ड’ले बिहीबार नेपाल समाजवादी पार्टीका अध्यक्ष डा. बाबुराम भट्टराई र नेपाली कांग्रेसका नेता तथा गृहमन्त्री बालकृष्ण खाँणसँग छुट्टाट्टा छलफल गरेका छन् । निर्वाचन आयोगले निर्वाचनको प्रतिवेदन बिहीबार राष्ट्रपति विद्यादेवी भण्डारी समक्ष बुझाएपछि नयाँ सरकार गठनको बाटो खुलेको छ ।
अध्यक्ष प्रचण्डले सत्ता समीकरण र गठबन्धनको भूमिकाका विषयमा छलफल भट्टराई र खाँणसँग छलफल गरेको माओवादी केन्द्रका नेता हितमान शाक्यले जानकारी दिए । छलफलमा तीन नेताहरुले वर्तमान गठबन्धनलाई कायमै राखेर सरकार गठन गर्नुपर्नेमा जोड दिएका थिए ।
पछिल्लो समय आफैं प्रधानमन्त्री बन्ने कसरतमा जुटेका प्रचण्ड सत्ता समीकरण निर्माणको आन्तरिक गृहकार्यलाई तीब्र पारेका हुन् । मंसिर १९ गते बालुवाटारमा बसेको सत्ता गठबन्धन बैठकले वर्तमान गठबन्धनबाट सरकार बनाउने निर्णय गरेको थियो । अहिले माओवादी केन्द्रकै नेतृत्वमा पहिलो चरणमै सरकार बनाउने गरी माओवादी नेताहरुले भित्रभित्रै भेटघाट तीब्र पारेका छन् ।
