काठमाडौं । कुनै बेला मधेसका मसिहा मानिने उपेन्द्र यादव पछिल्लो समय सत्ता र शक्तिका लागि जुनसुकै हदसम्म गिर्न तयार भएको विभिन्न घटनाक्रमले देखाएको छ ।
मधेसी मुक्तिको अभियानका नाममा सयौ युवालाई बलिदानी दिन लगाएका उपेन्द्रले त्यसलाई सत्ता र शक्तिको सिँढीका रुपमामात्रै सीमित गरेपछि मधेसमा आक्रोश बढेको छ । अझ मधेसी समुदायलाई माखे साङ्लो, विहारी भनेर होच्याउने राजनीतिक शक्तिसँग उपेन्द्रले सहकार्य नै गरेपछि मधेसी जनतामाझ आक्रोश बढेको हो ।
उपेन्द्रकै नेतृत्वमा आन्दोलनमा ४५ जना भन्दा बढी मधेसी युवाले आफ्नो प्राण मधेस मुक्तिका लागि दिए । तर त्यतिबेला जोविरुद्ध युवाहरु मधेस मुक्तिका लागि लगे तिनैसँग उपेन्द्रले हात मिलाएपछि शहिद परिवार पनि रुष्ट बनेको छ । एमाले र केपी ओलीको हठका कारण मधेसमा ‘मलेठ घटना’ हुनपुग्यो । जहाँ थुप्रै युवाहरु शहिद हुन पुगे ।
मधेसी समुदायलाई विहारी र भारतीयको नजरबाट हेर्ने ओली र एमालेको नीतिले त्यतिबेला सिंगो मधेसको विरुद्धमा थियो । त्यसविरुद्ध मधेसी युवालाई उचालेका उपेन्द्र आज आफै तिनै ओली र एमालेसँग मिल्न पुगेर आफू मधेसको लागि होइन सत्ता र शक्तिका लागि युवाहरुको रगतसँग, सहादतसँग खेलेको पुष्टि गराएका छन् ।
मधेस र मधेसीको मुक्तिका लागि ज्यान दिएका शहीदको सपनामाथि लात हानेका छन् । चुनावमा आफू बलियो हुन र सत्तामा पुग्न उनले मधेसविरोधी छवि भएको र मधेसी युवाको रगतको होलीको खेलेको एमालेलाई रोजेका छन् । एक हिसाबले भन्ने हो भने मधेसी समुदायसँग द्वन्द्व निम्त्याउने एमालेसँग उपेन्द्रको साँठगाँठले मधेसका जनतालाई मर्माहत बनाएको छ ।
जसपाकै एक नेताले एमालेसँग सहकार्य गर्नु आत्मघाती भएको बताए । मधेसमै जसपाभित्र यो सहकार्यलाई लिएर चरम असन्तुष्टि छाएको छ । मधेसप्रति असहिष्णु एमाले नेतृत्वसँग हात मिलाएको भन्दै धेरै ठाउँमा जसपाभित्र विद्रोहसमेत भएको छ । मधेसका युवाहरुले आफ्ना आफन्तको रगतको होली खेलेर हत्यारासँग साँठगाँठ गर्नु धोका भएको बताएका छन् ।
सप्तरीका प्रकाशचन्द्र यादवले यसको हिसाब आगामी चुनावमा हुने बताए । ‘यो सरासर मधेसी जनतालाई धोका हो । हामीले मधेस मुक्तिका लागि परिवारका सदस्य, साथीभाइ गुमायौं । तर उपेन्द्रले केबल आफ्नो स्वार्थमा सत्तामा जान केन्द्रित गरे । फेरि अहिले तिनै मधेसमाथि दमन गर्नेहरुसँग हात मिलाएर उपेन्द्रजीले मधेसमाथि धोका र बेइमानी गर्नुभयो,’ उनले भने ।
धनुषामा युवा अमरेश झाले उपेन्द्र सत्ताको उन्मादमा के ठिक के बेठिक भन्ने नै चुकेको बताए । आफ्नो स्वार्थका लागि जे पनि गर्ने उपेन्द्रलाई अब मधेसले दण्ड दिने बेला आएको उनले बताए । मधेसी समुदायको आत्मसम्मानमा ठेस पुर्याउनेसँग सहकार्य गरेर उपेन्द्रले सिंगो मधेसको भावनालाई कुल्चिएको उनको गुनासो थियो । उपेन्द्रले एमालेसँग सहकार्य गरेदेखि नै मधेसमा असन्तुष्टिका स्वरहरु बढ्दै गएका छन् ।
