काठमाण्डाै – सत्ता गठबन्धनको नेता कार्यकता भेला अन्तर्गत आज प्रदेश एक र मधेस प्रदेशमा कार्यक्रम हुँदैछ । यसअघि नै तय भएको कार्यक्रम कांग्रेसको समन्वयमा प्रदेश एकको विराटनगर र मधेस प्रदेशको जनकपुरमा हुँदैछ ।
प्रधानमन्त्री तथा नेपाली कांग्रेसका सभापति शेरबहादुर देउवासहित पाँचदलीय गठबन्धनका शीर्षनेताहरु भेलामा संबोधनका लागि पुग्नुहुनेछ । मधेस प्रदेशस्तरीय कार्यकर्ता भेलालाई सम्बोधन गर्न प्रधानमन्त्री देउवासहित गठबन्धनका शीर्षनेताहरु जनकपुरधाम आउन लागेको कांग्रेस धनुषाका सभापति योगेन्द्र पञ्जियारले जानकारी दिनुभयो ।
सत्ता गठबन्धनले हिजो बुटबल र पोखरामा संयुक्त नेता–कार्यकर्ता भेला गरेको थियो । आउँदो चुनावमा तालमेल गरेर संयुक्त उम्मेदवार उठाएका गठबन्धनका दलले चुनावलाई नै लक्षित गरेर सात वटै प्रदेशमा संयुक्त रुपमा प्रदेश स्तरीय कार्यकर्ता भेला गर्ने निर्णय गरेका थिए । भोलि छ गते नेकपा माओवादी केन्द्रको समन्वयमा सुदूरपश्चिमको धनगढी र कांग्रेसको समन्वयमा कर्णाली प्रदेशको सुर्खेतमा भेला आयोजना हुनेछ । अन्तिम भेला ७ गते माओवादीको समन्वयमा काठमाण्डौमा हुनेछ ।
