काठमाडौं । प्रदेश २ का नीति तथा योजना आयोगले प्रदेश २ सरकारलाई वार्षिक प्रतिवेदन बुझाएको छ ।
आर्थिक वर्ष २०७७र७८ को वार्षिक प्रतिवेदन बुधवार एक कार्यक्रम बीच आयोगका उपाध्यक्ष डा. भोगेन्द्र झाले मुख्यमन्त्री लालबाबु राउतलाई बुझाएका हुन् ।
मुख्यमन्त्री राउत आयोगका अध्यक्षका समेत छन् ।
गत आर्थिक वर्षमा गरेका काम र गतिविधिहरुको विवरण समेटिएका ६० पृष्ठको तयार प्रतिवेदन आयोगले सरकारलाई हस्तान्तरण गरेको हो ।
नीति तथा कार्यक्रम, विषयगत मन्त्रालयको बजेट सिमा निर्धारण र मार्ग दर्शन, मध्यमकालिन खर्च संरचना, दीगो विकासका लक्ष्यहरुको मार्गचित्र लगायतकाहरु कुरा प्रतिवेदनमा समेटिएको उपाध्यक्ष डा.झाले बताए ।
सो प्रतिवेदनमा प्रदेशको जनसांख्यिक अवस्था, प्रोफाइल निर्माण, प्रदेश अनुगमन तथा मुल्यांकन दीग्दर्शन, प्रदेश योजना तथा कार्यक्रम दीग्दर्शन निर्माण लगायतका कुराहरु समेत समेटिएको उनले जानकारी दिए ।
सो प्रतिवेदनलाई मुख्यमन्त्री राउतले प्रदेश सभाको आगामी बस्ने बैठकमा पेश गर्ने छन् । प्रतिवेदन हस्तान्तरण कार्यक्रममा भौतिक पूर्वाधार विकास मन्त्री रामसरोज यादव, आयोगका पदाधिकारी तथा कर्मचारी र मुख्यमन्त्री कार्यालयका कर्मचारीहरुको उपस्थिति रहेको थियो ।
