काठमाडौं । कोरोना भाइरसको संक्रमणका कारण लामो समयदेखि बन्द नेपाल–भारत सिमा नाका खुलेको छ । मंगलबार बसेको मन्त्रिपरिषद् बैठकले कोरोनाका कारण बन्द गरिएका सीमा नाका खुला गर्ने निर्णय गरेको हो ।
सरकारका प्रवक्ता समेत रहेका कानुन, न्याय तथा संसदीय मामिलामन्त्री ज्ञानेन्द्रबहादुर कार्कीले सीमा नाका खोल्ने निर्णय भएको पुष्टि गरे । नाका बन्द रहेका कारण कैयौं व्यक्तिको बिवाह समेत रोकिएको छ । साथै भारतबाट समान निर्यातमा समस्या सृजना भएर महंगिएको थियो । सिमा नाका खोल्न सिमावर्ती क्षेत्रका बासिन्दाले पटक पटक सरकारसँग माग गर्दै धर्ना समेत बसेको थियो ।
सरकारले कोभिड–१९ व्यवस्थापन आदेश, ०७८ जारी गरेको छ । अघिल्लो सरकारले जारी गरेको कोभिड–१९ संकट व्यवस्थापन सम्बन्धी अध्यादेश खारेज भएका कारण सरकारले नयाँ आदेश जारी गरेको हो । सो आदेशबाट प्रधानमन्त्रीको संयोजकत्वमा कोभिड–१९ निर्देशक समिति गठन भएको छ ।
समितिमा स्वास्थ्यमन्त्री, गृहमन्त्री, अर्थमन्त्री, परराष्ट्रमन्त्री, उद्योगमन्त्री, मुख्यसचिव र प्रधान सेनापति सदस्य रहने छन् । बैठकले कोभिड–१९ सम्बन्धी विधेयक, औषधि ऐन, ०३५ लाई संशोधन गर्न बनेको ऐन संघीय संसद्मा पेश गर्न स्वीकृति दिएको छ । बैठकले संयुक्त राष्ट्रसंघको ७६ औं महासभामा भाग लिन जाने नेपाली प्रतिनिधिमण्डलको समेत टुंगो लगाएको छ ।
