राम एकवाल महरा
जनकपुरधाम । करिब एक सातादेखि विभिन्न ५ बुँदे माग राख्दै आमरण अनशनमा बसेका चुरे अभियन्ताहरुको स्वास्थ्य अवस्था बिग्रिँदै गएको छ ।
२८ साउनदेखि जनकपुरस्थित जनक चोकमा आमरण अनशनमा बसेका चुरे अभियन्ताद्वय अमन यादव र रानी रायको स्वास्थ्य अवस्था बिग्रिँदै गएको हो । सिरहा मिचैयास्थित मारुती सिमेन्टले कब्जा गरेको वन बुटेनको जग्गा फिर्ता हुनुपर्नेलगायत विभिन्न ५ बुँदे माग राख्दै अनशनकारीहरु आमरण अनशनमा बसेका हुन् ।
तराई मधेसको लाइफलाइनको रुपमा रहेको चुरे तथा वनजंगल दिनरप्रतिदिन दोहन हुँदै गइरहेकोले आफूहरुले माग पूरा नभएसम्म अनशन कुनै पनि हालतमा नतोड्ने चुरे तथा वनजंगल संरक्षण अभियान धनुषाका संयोजक अमन यादवले बताए ।
यादवले माग पूरा नभएसम्म मरे पनि अनसन नतोड्ने अडान लिएका छन् । उनले सरकारले माग पूरा नगरे अनशनस्थलमै प्राण त्याग्ने अडान राखेका छन् ।
उनीहरुले चुरे अभियानीमाथि लगाइएको झुठा मुद्दा खारेज हुनुपर्ने, वन नियमावली २०५१ को दफा २२ लाई मिचेर डिभिजन वन कार्यालय सिरहाका प्रमुख सुभाष दासले गरेको आर्थिक कार्यक्रमको छानविन हुनुपर्नेलगायत विभिन्न ५ बुँदे माग अगाडि सारेका हुन् ।
