काठमाडौं । नेपाल कम्युनिष्ट पार्टीका केन्द्रीय सदस्य एवं सर्लाही ईन्चार्ज डचाराज वाग्लेको सवारी दुर्घटनामा मृत्यु भएको छ ।
ज. १० प ३२०६ नम्बरको मोटरसाईकलमा सवार भई बरहथबाबाट नयाँरोडतर्फ आउँदै गर्दा बाटोमै लडेर उनको मृत्यु भएको प्रहरीले जनाएको छ ।
जिल्ला प्रहरी कार्यालय सर्लाहीका अनुसार मूर्तिया चोकबाट केही सय मिटर उत्तर वन कार्यालय नजिक नयाँरोड–बरहथवा सडकखण्डमा बुधबार राती ९ बजे लडिरहेको अबस्थामा वाग्लेलाई स्थानीयले देखेका थिए ।
स्थानीयले खबर गरेपछि प्रहरीले बरहथवा स्थित प्राथमिक स्वास्थ्य केन्द्रमा पुर्याउँदा चिकित्सकले वाग्लेको मृत्यु भईसकेको बताएको ईलाका प्रहरी कार्यालय बरहथवाका प्रमुख प्रहरी नायब उपरीक्षक उद्यव सिंह भाटले जानकारी दिए । प्रनाउ भाटका अनुसार प्रहरी टोली घटनास्थल पुग्दा वाग्लेको टाउकोमा हेल्मेट र आँखामा चश्मा थियो ।
‘आँखाको छेउमा निलडाम जस्तो देखिएको थियो, अन्य ठूलो चोटपटक देखिएको थिएन, चोटपटक हेर्ने भन्दापनि हतार हतार एम्बुलेन्समा राखेर उपचारका लागि बरहथवा स्थित प्राथमिक स्वास्थ्य केन्द्रतर्फ पठाईएको थियो त्यहाँ डाक्टरले मृत्यु भइसकेको घोषणा गर्नुभयो,’ उनले भने ।
घटनास्थलको अवस्था हेर्दा आफै लडेको हो वा कुनै जनारसँग ठोक्किर लडेको हो जस्तो देखिएको उनले बताए । दुर्घटनाबारे गम्भिर एवं सुक्ष्म रुपमा अनुसन्धान भईरहेको उनको भनाइ छ ।
नेकपा जिल्ला अध्यक्ष रेवती पन्तका अनुसार वाग्ले बुधबार दिउँसो बरहथवामा पार्टीको जिल्ला कमिटीको पूर्ण बैठकमा सहभागि भई पार्टीले नै बुधबार साँझ आयोजना गरेको मसाल जुलुसको नेतृत्व गर्न बरहथवामा बसेका थिए ।
पन्तका अनुसार उक्त मसाल जुलुस सम्पन्न गरेर नयाँरोडतर्फ फर्किने क्रममा वाग्ले मोटरसाईकल दुर्घटनामा परेका हुन् ।
