काठमाडौं । फेडरेशन अफ वेस्टर्न इन्डिया सिने एम्प्लोइजले सोमबार आफ्ना चार लाखभन्दा बढी सदस्यले अभिनेता रणवीर सिंहसँग काम नगर्ने घोषणा गरेको छ। संगठनको यो निर्णय फिल्म ‘डन ३’ बाट रणवीर सिंह अन्तिम समयमा बाहिरिएपछि आएको हो।
फेडरेशनका अनुसार यो फिल्म विगत तीन वर्षदेखि निर्माणको प्रक्रियामा रहेको थियो। फेडरेशन अफ वेस्टर्न इन्डिया सिने एम्प्लोइज (एफडब्लूआइसीई) भारतीय फिल्म र टेलिभिजन उद्योगमा काम गर्ने कर्मचारी, कलाकार र प्राविधिकहरूको छाता संगठन हो।
फिल्म निर्माता तथा निर्देशक फरहान अख्तर र उनका पार्टनर रितेश सिधवानीले रणवीर सिंहविरुद्ध इन्डियन फिल्म एन्ड टेलिभिजन डाइरेक्टर्स एसोसिएसनमा उजुरी दर्ता गराएका थिए। त्यसपछि एसोसिएसनले यस मामलामा थप कारबाहीका लागि यो विषय फेडरेशन अफ वेस्टर्न इन्डिया सिने एम्प्लोइजलाई पठाएको थियो।
यस सम्पूर्ण विवादमा पहिलो पटक प्रतिक्रिया दिँदै रणवीर सिंहले एक विज्ञप्ति जारी गरी आफूले कहिल्यै सार्वजनिक रूपमा प्रतिक्रिया दिन वा कुनै पनि किसिमको अनुमानलाई बढावा दिन आवश्यक नठानेको बताएका छन्। उनले आफ्नो ध्यान आफ्ना काम र आगामी प्रतिबद्धताहरूमा मात्र केन्द्रित रहेको स्पष्ट पारेका छन्।
‘डन ३’ लोकप्रिय फ्रेन्चाइजको तेस्रो शृङ्खला हुने तय थियो, जसमा नयाँ अनुहारका रूपमा रणवीर सिंहलाई अनुबन्ध गरिएको थियो। फिल्मको छायांकन भने अझै सुरु भइसकेको थिएन। निर्माताहरूले प्रि-प्रोडक्सनको चरणमा मात्रै हालसम्म ४५ करोड रुपैयाँभन्दा बढी खर्च भइसकेको दाबी गरेका छन्।
फेडरेशनका मुख्य सल्लाहकार अशोक पण्डितले मुम्बईमा सञ्चारकर्मीहरूसँग कुरा गर्दै गत अप्रिल ११ मा फरहान अख्तरले छायांकनका लागि युनिट प्रस्थान गर्नुभन्दा तीन हप्ता अघि मात्र रणवीरले फिल्म छोडेको भन्दै उजुरी दर्ता गराएको जानकारी दिए।
उजुरी परेपछि फेडरेशन अफ वेस्टर्न इन्डिया सिने एम्प्लोइजले निर्देशकसहित ‘डन ३’ को टोलीसँग छलफल गरेको थियो। अशोक पण्डितका अनुसार उक्त टोलीले दुई घण्टासम्म सम्पूर्ण घटनाक्रमको जानकारी गराएको र प्रि-प्रोडक्सनमा भएको सम्पूर्ण खर्चको विवरण समेत पेश गरेको थियो, जसको हिसाब-किताब र लेखापरीक्षण (अडिट) भइसकेको छ।
यस खर्चमा २०० भन्दा बढी कर्मचारीका लागि होटल, लोकेशन र विदेश भ्रमणको बुकिङ समावेश रहेको र सबै कुरा कागजातमा प्रमाणित रहेको उनले बताए। यस प्रोजेक्टलाई वित्तीय सहयोग गरिरहेको एक्सेल इन्टरटेनमेन्टले रणवीर सिंहसँग प्रि-प्रोडक्सनमा भएको खर्चको क्षतिका रूपमा ४५ करोड रुपैयाँ माग गरेको छ।
फेडरेशनले रणवीर सिंहलाई आफ्नो पक्ष राख्नका लागि आमन्त्रण गरे पनि हरेक १० दिनमा तीन पटकसम्म स्मरण गराउँदा समेत उनले कुनै जवाफ नदिएको जनाएको छ। फेडरेशनका अध्यक्ष बीएन तिवारीले उद्योगलाई कुनै पनि सुपरस्टार कानुनभन्दा माथि नरहेको सन्देश दिन चाहेको उल्लेख गर्दै जबसम्म उनी व्यक्तिगत रूपमा भेट्न आउँदैनन्, तबसम्म असहयोगको निर्देशन जारी रहने बताएका छन्।
यस विवादका बीच रणवीर सिंहका आधिकारिक प्रवक्ताले एक विज्ञप्ति जारी गर्दै अभिनेताले फिल्म उद्योग र ‘डन’ फ्रेन्चाइजसँग जोडिएका सबै व्यक्तिको उच्च सम्मान गर्ने उल्लेख गरेका छन्। विज्ञप्तिमा ‘डन ३’ सँग जोडिएको हालैको घटनाक्रममा रणवीर सिंहले मौन बस्न रुचाएको, किनकि व्यावसायिक छलफल र व्यक्तिगत सम्बन्धलाई मर्यादा, परिपक्वता तथा आपसी सम्मानका साथ समाधान गरिनुपर्छ भन्ने उनको मान्यता रहेको जनाइएको छ।
समयसँगै विभिन्न किसिमका अड्कलबाजी र दाबीहरू बाहिर आए पनि उनले सार्वजनिक रूपमा स्पष्टीकरण दिनु आवश्यक नठानेको र उनको ध्यान काममा मात्र रहेको प्रवक्ताले दोहोर्याएका छन्। प्रवक्ताका अनुसार रणवीर सिंह फिल्मसँग आबद्ध सबैप्रति सम्मान र शुभकामना व्यक्त गर्दै फ्रेन्चाइजको सफलताको कामना गर्दछन्।
‘डन ३’ रणवीर सिंह फिल्मबाट बाहिरिएदेखि नै विवादमा घेरिएको थियो। रणवीर सिंहको इन्कारपछि फरहान अख्तरको प्रोडक्सन कम्पनी एक्सेल इन्टरटेनमेन्टले प्रोड्युसर्स गिल्ड अफ इन्डियासँग सम्पर्क गरी अभिनेताले अन्तिम समयमा प्रोजेक्ट छोड्दा करिब ४० करोड रुपैयाँको नोक्सानी भएको दाबी गरेको थियो।
रणवीर सिंहले कुन कारणले फिल्म छोडे भन्नेबारे अहिलेसम्म कुनै आधिकारिक भनाइ सार्वजनिक भएको छैन। यद्यपि, केही रिपोर्टहरूका अनुसार उनले स्क्रिप्टप्रति सन्तुष्ट हुन नसकेका कारण यो प्रोजेक्ट छोडेको बताएका थिए। पछि रणवीर सिंहले फरहान अख्तरले ऋतिक रोशनलाई फिल्ममा लिन चाहेको आरोप समेत लगाएका थिए, तर फिल्म ‘धुरन्धर’ को सफलतापछि उनको निर्णय बदलिएको दाबी गरिएको थियो।
केही दिनअघि ऋतिक रोशनले यी दाबीहरूलाई खारेज गर्दै आफूलाई ‘डन ३’ का लागि कहिल्यै सम्पर्क नगरिएको प्रष्ट पारेका थिए। उनले भेराइटी इन्डियासँग कुरा गर्दै एउटा हल्लाका रूपमा सुरु भएको कुराले अहिले फरक रूप लिएकाले सत्यता बाहिर ल्याउनु जरुरी रहेको बताएका थिए। उनले आफूलाई कुनै पनि समयमा ‘डन ३’ को अफर नगरिएको र सञ्चारमाध्यमलाई यस्ता अपुष्ट दाबीहरूबाट टाढा रहन अनुरोध गरेका थिए।
सन् २०२३ मा रणवीर सिंहले डनको तेस्रो फिल्ममा मुख्य भूमिका निभाउने घोषणा गरिएको थियो। त्यतिबेला फरहान अख्तरले एक्स (ट्विटर) मा एउटा पोस्ट सेयर गर्दै “एउटा नयाँ युगको सुरुवात” भनी लेखेका थिए।
‘डन’ सन् १९७८ को एउटा क्लासिक फिल्म हो, जसमा अमिताभ बच्चन मुख्य भूमिकामा थिए। फरहान अख्तरले सन् २००६ मा यसको पहिलो रिमेक बनाएका थिए, जसमा शाहरुख खान मुख्य भूमिकामा देखिएका थिए। पछि सन् २०११ मा उनले यसको सिक्वेल ‘डन २’ पनि बनाए, जसमा पनि शाहरुख खान नै मुख्य भूमिकामा रहेका थिए।
