महेश सिंह सिरहा, लहान —लहान नगरपालिका–२४ रनहा सिमलटोल निवासी ७६ वर्षीय झरीलाल साहको सोमबार निधन भएको छ। परिवारका अनुसार लामो समयदेखि खुट्टासम्बन्धी समस्याबाट पीडित रहेका साहको २८ गते निधन भएको हो।
स्वर्गीय साहका जेठो छोरा दिलिप साह, कान्छो छोरा रबिन्द्र साह, एक छोरी तथा श्रीमती रहेका छन्। परिवार अहिले शोकमा डुबेको छ। हिन्दु परम्पराअनुसार स्थानीय सरेखोलामा अन्तिम संस्कार सम्पन्न गरिएको परिवारले जनाएको छ। दागबत्ती जेठो छोरा दिलिप साहले दिएका थिए।
परिवारका अनुसार निधनपश्चात १२ दिनसम्म धार्मिक परम्पराअनुसार क्रियाकर्ममा बस्ने चलन रहेको छ।
स्थानीयवासीका अनुसार स्वर्गीय झरीलाल साह गाउँका इमानदार, सामाजिक तथा सच्चा किसानका रूपमा परिचित थिए। उनले जीवनभर गाउँमै बसेर खेतीपाती गर्दै आफ्ना दुवै छोरा दिलिप साह र रबिन्द्र साहलाई उच्च शिक्षासम्म अध्ययन गराएका थिए।
जेठो छोरा दिलिप साह किसानहरूको हकहितका लागि काम गर्ने संस्था “राष्ट्रिय कृषक समूह महासंघ नेपाल” का मधेश प्रदेश कर्मचारी प्रमुखसमेत रहेका छन्। कृषक अधिकार, कृषि विकास तथा किसान सशक्तीकरणका क्षेत्रमा सक्रिय रहेका दिलिप साह मातृभूमि र किसान समुदायप्रति समर्पित व्यक्तिका रूपमा चिनिन्छन्।
झरीलाल साहको निधनले गाउँमा दुःखको वातावरण सिर्जना भएको छ। स्थानीयले उनलाई मेहनती, सरल, समाजप्रेमी तथा कृषिप्रति समर्पित व्यक्तिका रूपमा सम्झिरहेका छन्।
