काठमाडौं । विश्व स्वास्थ्य संगठन ले कोभिड–१९ को अत्यधिक उत्परिवर्तित नयाँ भेरियन्ट ‘सिकाडा’ (बीए ३.२) लाई उच्च निगरानीमा राखेको जनाएको छ। हाल यो भेरियन्ट विश्वका २३ देशमा फैलिएको बताइएको छ।
सन् २०२४ नोभेम्बरमा दक्षिण अफ्रिकामा पहिलो पटक पहिचान गरिएको यो भेरियन्ट लामो समय निष्क्रिय जस्तै रहेर पछिल्ला महिनाहरूमा संयुक्त राज्य अमेरिका, बेलायत र हङकङ लगायत क्षेत्रमा तीव्र रूपमा फैलिन थालेको हो। लामो समय ‘अन्डरग्राउन्ड’ बसेर अचानक सक्रिय हुने विशेषताका कारण यसलाई ‘सिकाडा’ नाम दिइएको हो।
अमेरिकी रोग नियन्त्रण तथा रोकथाम केन्द्र ले यसलाई ओमिक्रोनभन्दा निकै फरक र शरीरको प्रतिरक्षा प्रणालीलाई छल्न सक्ने क्षमतायुक्त भेरियन्टका रूपमा वर्णन गरेको छ।
यस भेरियन्टको अर्को विशेषता भनेको बालबालिकामा संक्रमणको दर बढी देखिनु हो। न्यूयोर्कमा गरिएको अध्ययनमा बालबालिकाहरूमा कोभिड परीक्षणको पोजिटिभ दर वयस्कको तुलनामा बढी देखिएको अनुसन्धानकर्ता रयान हिस्नरले बताएका छन्।
क्याम्ब्रिज इन्स्टिच्युट अफ थेराप्युटिक इम्युनोलोजीका प्रोफेसर रवीन्द्र गुप्ता का अनुसार बालबालिकाको प्रतिरक्षा प्रणाली पूर्ण रूपमा विकसित नभएकाले उनीहरू यस भेरियन्टप्रति बढी संवेदनशील देखिएका हुन्।
यद्यपि, हालसम्म ‘सिकाडा’ भेरियन्टले अन्य भेरियन्टको तुलनामा गम्भीर बिरामी बनाउने वा अस्पताल भर्ना दर बढाउने ठोस प्रमाण फेला परेको छैन।
यसका लक्षणहरू ज्वरो, खोकी, घाँटी दुख्ने, थकान तथा सास फेर्न गाह्रो हुने जस्ता सामान्य कोभिड लक्षणहरू जस्तै नै रहेका छन्। विज्ञहरूका अनुसार भाइरसले उही प्रकारका कोषिकालाई लक्षित गर्ने भएकाले लक्षणमा ठूलो भिन्नता देखिएको छैन।
युनिभर्सिटी अफ इस्ट एङ्ग्लियाका महामारी विशेषज्ञ प्रोफेसर पल हन्टर ले कोभिडका नयाँ भेरियन्टहरू आउँदै रहने तर गम्भीर असर पार्ने सम्भावना कम रहेको बताएका छन्।
हाल उपलब्ध खोपहरूले पूर्ण सुरक्षा नदिए पनि संक्रमणको गम्भीरता घटाउन प्रभावकारी देखिएका छन्। विश्व स्वास्थ्य संगठन का अनुसार यस भेरियन्टबाट सार्वजनिक स्वास्थ्यमा जोखिम हाल न्यून रहेको छ।
विशेषगरी ६५ वर्षमाथिका ज्येष्ठ नागरिक, दीर्घरोगी तथा कमजोर प्रतिरक्षा भएका व्यक्तिहरूले भने थप सावधानी अपनाउनुपर्ने चिकित्सकहरूको सुझाव छ। बालबालिकामा पनि कुनै जटिल लक्षण देखिएमा तुरुन्त स्वास्थ्य परामर्श लिन आग्रह गरिएको छ।
