सर्लाही । भूमि व्यवस्था, सहकारी तथा गरिबी निवारण मन्त्रालयले सरकारी कार्यालयहरूमा बिचौलियाको प्रवेश निषेध गर्न निर्देशन जारी गरे पनि जिल्लाका विभिन्न निकायमा उनीहरूको गतिविधि अझै रोकिएको छैन।
देशभरका मालपोत, नापी लगायतका कार्यालयमा बिचौलिया निषेध गर्ने स्पष्ट निर्देशन भए पनि सर्लाहीका केही कार्यालयमा यसको प्रभावकारी कार्यान्वयन हुन नसकेको देखिएको छ।
गत आइतबार जिल्ला सदरमुकाम मलंगवास्थित भूमि सुधार तथा मालपोत कार्यालय तथा यातायात व्यवस्था कार्यालयको ट्रायल सेन्टरबाट प्रहरीले ९ जना बिचौलियालाई पक्राउ गरेको छ। उनीहरूले सेवाग्राहीको काम छिटो गराइदिने भन्दै रकम असुल्दै आएको आरोप छ।
यसैबीच, बरहथवास्थित नापी कार्यालय परिसरमा पनि बिचौलियाको सक्रियता घटेको छैन। लेखापढी व्यवसायीको नाममा बस्ने केही व्यक्तिहरूले सेवाग्राहीलाई सहज सेवा उपलब्ध गराइदिने बहानामा अतिरिक्त रकम लिने गरेको स्थानीयको गुनासो छ।
स्थानीयका अनुसार बिचौलियाहरूले काम मिलाइदिने नाममा सेवाग्राहीबाट करिब २ हजारदेखि २५ सय रुपैयाँसम्म असुल्ने गरेका छन्। कतिपय अवस्थामा कार्यालय प्रमुखकै मिलेमतोमा बिचौलियामार्फत काम गराउने गरिएको आरोपसमेत लागेको छ।
जिल्लाका अन्य यातायात व्यवस्था कार्यालय, ट्रायल सेन्टर, भूमि सुधार तथा मालपोत लगायतका निकायमा पनि बिचौलियाको सक्रियता कायम रहेको बताइएको छ।
सरकारी कार्यालयमा बिचौलियाको पहुँचका कारण सेवाग्राही प्रत्यक्ष प्रभावित भएका छन्। कानुनी रूपमा निःशुल्क वा न्यून शुल्कमा उपलब्ध हुने सेवाका लागि समेत अतिरिक्त रकम तिर्न बाध्य बनाइएको भन्दै सर्वसाधारण आक्रोशित बनेका छन्।
