सिरहाको नवराजपुर गाउँपालिका वडा नं १, गेरुवामा बजरंग युवा क्रिकेट क्लब (BYCC) गेरुवाहको आयोजनामा २२औं हाजिरी जवाफ प्रतियोगिता सम्पन्न भएको छ। प्रतियोगितामा नवराजपुर, भगवानपुर, र सखुवानान्कारकट्टी गाउँपालिकाअन्तर्गतका माध्यमिक विद्यालयका आठ विद्यालयका विद्यार्थीहरूले उत्साहपूर्वक सहभागिता जनाए। प्रतियोगितामा विद्यार्थीहरूबीच निकै प्रतिस्पर्धात्मक वातावरण देखिनुका साथै यसले विद्यार्थीको शैक्षिक स्तरमा उल्लेखनीय योगदान पुर्याएको छ।
कार्यक्रम क्लब सदस्य मनोज कुमार यादवको संयोजकत्वमा सम्पन्न भएको थियो। अनुसंधानका प्रहरी नायव निरीक्षक रिझन यादवका अनुसार, प्रतियोगिता निस्पक्ष रुपमा सम्पन्न गरिएको थियो। भगवानपुर गाउँपालिका अध्यक्ष उग्र नारायण यादव, सखुवानान्कारकट्टी गाउँपालिका अध्यक्ष केदार नाथ यादव, र नवराजपुर वडा नं. १ का अध्यक्ष नवीन कुमार यादवको विशेष उपस्थितिमा कार्यक्रम सम्पन्न भएको थियो।
प्रतियोगितामा मावि महदेवा पोर्ताहाले प्रथम स्थान हासिल गर्दा मावि महेशवरी दोस्रो र मावि मोवाही तेस्रो स्थानमा रहेका थिए। विजेताहरूलाई सम्मान गरिएको यस प्रतियोगिताले नवराजपुर क्षेत्रका विद्यार्थीहरूलाई शैक्षिक तथा आत्मविश्वास अभिवृद्धि गर्न उल्लेखनीय सहयोग पुर्याएको मानिएको छ।
यस अवसरमा भगवानपुर, सखुवानान्कारकट्टी, र नवराजपुरका जनप्रतिनिधिहरूको विशेष उपस्थिति थियो भने छात्राहरूको सामाचकेवा नृत्यले कार्यक्रमलाई सांस्कृतिक रङ्गमा सजाएको थियो। विगत २ दशकदेखि निरन्तर आयोजना हुँदै आएको यो प्रतियोगिता क्षेत्रीय शैक्षिक तथा सांस्कृतिक प्रगतिको प्रतीक बनेको छ। क्लब अध्यक्ष राम बालक यादवका अनुसार, यो प्रतियोगिताले युवाहरूलाई नयाँ उत्साह र प्रेरणा प्रदान गर्दै आएको छ।
कार्यक्रम संयोजक मनोज कुमार यादवले यस प्रतियोगिताले नवराजपुरको शैक्षिक र सांस्कृतिक वातावरणलाई थप समृद्ध बनाएको बताउँदै आगामी दिनमा यस्ता कार्यक्रमहरूलाई निरन्तरता दिने प्रतिबद्धता व्यक्त गरेका छन्।
