एजेन्सी । गत महिना भएको हिंसात्मक झडपमा एक व्यक्तिको मृत्यु भएको भन्दै बंगलादेशकी पूर्वप्रधानमन्त्री शेख हसिना र अन्य ६ जनाविरुद्ध हत्याको मुद्दा दर्ता गरिएको छ । मंगलबार मिडिया रिपोर्टलाई उद्धृत गर्दै यो जानकारी आएको हो ।
बंगलादेशमा हिंसा र सरकारको पतनपछि शेख हसिनाविरुद्ध दर्ता भएको यो पहिलो मुद्दा हो । बंगलादेशी मिडियाका अनुसार यो मुद्दा किराना पसलका मालिक अबु सईदका शुभचिन्तकहरूले दायर गरेका थिए, जुन जुलाई १९ मा प्रहरीको गोली लागेर मारिएका थिए ।
शेख हसिनाविरुद्ध दर्ता भएको मुद्दामा अवामी लिगका महासचिव ओबैदुल कादर, पूर्व गृहमन्त्री असदुज्जमान खान कमल र पूर्व प्रहरी महानिरीक्षक चौधरी अब्दुल्लाह अल मामुनको नाम पनि सामेल छन् । यी बाहेक कैयौं उच्च प्रहरी अधिकारी र अन्य अधिकारीलाई पनि अभियुक्त बनाइएको छ ।
यससँगै बीएनपीले खालिदा जिया र उनका छोरा तारिक रहमानमाथि दर्ता भएका सबै मुद्दा फिर्ता लिन अन्तरिम सरकारलाई अपिल गरेको छ । बीएनपी अध्यक्ष खालिदा जिया हालै जेलबाट रिहा भईसक्नु भएको छ।
बंगलादेशमा अन्तरिम सरकार बनेपछि पनि हिंसा रोकिएको छैन । पछिल्लो हिंसामा प्रदर्शनकारीहरूले राजधानी ढाकाको सेतु भवनलाई निशाना बनाएका छन् । सेतु भवनमा बंगलादेशको सडक, यातायात र पुल विभागको कार्यालय छ । प्रदर्शनकारीले सेतु भवनमा ढुंगामुढा गरी तोडफोड गर्नुका साथै त्यहाँ पार्किङ गरेका धेरै सवारीसाधनमा आगजनी गरेका छन् ।
