३ जना सुरक्षाकर्मी मारिए, उड्न लागेका विमानमा गोली हानियो
काठमाडौँ — मेक्सिकोमा कुख्यात लागूऔषध माफिया एल चापोका छोरालाई गिरफ्तार गरेपछि हिंसा भड्किएको छ । ‘ड्रग लर्ड’ का रूपमा चर्चित एल चापोका छोरा ओभिडिओ गुजम्यान लोपेजलाई प्रहरीले गिरफ्तार गरेपछि सिनाओआ प्रान्तमा हिंसा भड्किएको हो । ओभिडिओले आफूलाई बुवाको अवैध धन्धाको प्रमुख बताउँदै आएका छन् ।
यसअघि अमेरिकी विदेश मन्त्रालयले डिसेम्बर १६ मा ओभिडिओलाई ‘सिनालोआ कार्टेलको सिनियर सदस्य’ भएको दाबी गरेको थियो । साथै अमेरिकाले उनका बारेमा सूचना दिनेलाई ५ मिलियन डलर पुरस्कार दिने घोषणा गरेको थियो । सन् २०१९ को अक्टोबरमा संघीय सुरक्षा निकायले उनलाई गिरफ्तार गरे पनि हिंसा भड्किने भन्दै राष्ट्रपति आन्द्रेज म्यानुएल लोपेज ओब्राडोरको निर्देशनमा रिहा गरिएको थियो ।
६ महिनाको निगरानीपछि ओभिडियोलाई बिहीबार कुलियाकान सहरबाट गिरफ्तार गरिएको हो । उनको गिरफ्तारीपछि भड्किएको हिंसामा ३ जना सुरक्षाकर्मी मारिएको बीबीसीले जनाएको छ । ओभिडियोको समूहका सदस्यहरू सडकमा आएर अन्धाधुन्ध गोली प्रहार गरेका छन् । सिनालोआ विमानस्थलमा उड्न लागेका दुई वटा जहाजमा गोली प्रहार गरिएको बीबीसीले उल्लेख गरेका छन् । घटनापछि सिनालोआ विमानस्थलमा १ सयभन्दा बढी उडान स्थगित गरिएको छ । सुरक्षाको कारण देखाउँदै विमानस्थल बन्द गरिएको छ । सिनालोआका गभर्नरका अनुसार १८ जनालाई अस्पताल भर्ना गरिएको छ ।
‘द माउस’ का रूपमा परिचित ओभिडियो बुवाको अवैध धन्धाबाट अलग समूह बनाएर नेतृत्व गरेको मेक्सिकोका रक्षामन्त्री लुई क्रेसिन्सियोले बताएका छन् । यो समूह विश्वकै सबैभन्दा ठूलो लागूऔषध कारोबार गर्ने समूह मानिन्छ ।
