एजेन्सी — इरानले सरकारविरुद्ध प्रदर्शनमा सहभागी एक व्यक्तिलाई मृत्युदण्ड दिएको छ । ‘मोहरेबह’ रेभुलुसनरी अदालतले दोषी ठहर गरेका मोहसिन शेकारीलाई बिहीबार बिहान फाँसी दिइएको इरानी सरकारी सञ्चारमाध्यमलाई उद्धृत गर्दै बीबीसीले जनाएको छ ।
विरोध प्रदर्शनमा संलग्नलाई मृत्युदण्ड दिइएको यो पहिलो घटना हो । उनीमाथि ईश्वरविरुद्ध युद्ध सुरु गरेको आरोप लगाइएको थियो । शेकारीले गत सेप्टेम्बरमा तेहरानको मुख्य सडक अवरुद्ध गरेका र अर्धसैनिक बलका एक सदस्यलाई छुरा प्रहार गरी घाइते बनाएका अभियोग लगाइएको थियो ।
एक अधिकारकर्मीले उनलाई ‘कुनै प्रक्रियाबिना देखावटी रूपमा गरिएको गत सुनुवाइमा दोषी ठहर गरिएको’ बताएका छन् । ‘अन्तर्राष्ट्रिय समुदायले यो मृत्युदण्डविरुद्ध तत्काल र सशक्त प्रतिक्रिया जनाउनुपर्छ,’ नर्वेस्थित इरान मानवअधिकारका निर्देशक महमुद अमिरी–मोगहदमले भने, ‘इरान सरकारले गम्भीर परिणामहरू नभोगेसम्म प्रदर्शनकारीहरूको सामूहिक फाँसी हुने शेकारीको मृत्युदण्डले देखिएको छ ।’
रेभोलुसनरी अदालतका अनुसार शेकारीले सेप्टेम्बर २५ मा तेहरानस्थित सत्तर खान सडक अवरुद्ध पारेका र बासिज अर्धसैनिक बलका एक सदस्यलाई छुरा प्रहार गरी घाइते बनाएका थिए । बासिज फौज इरानमा दंगा तथा प्रदर्शनहरू नियन्त्रणका लागि प्रयोग गरिन्छ ।
