काठमाडौं । प्रदेश २ का मुख्यमन्त्री लालबाबु राउतले मंगलबार प्रदेशका उद्योग, पर्यटन, वन तथा वातावरण मन्त्री रामनरेश रायलाई पदमुक्त गरे ।
नेकपा (एकीकृत समाजवादी) लाई प्रदेश सरकारमा सहभागी गराउन मुख्यमन्त्री राउतले मन्त्री रायलाई राजीनामा दिन गत आइतबार नै निर्देशन दिएका थिए । तर, उनी भने मानेनन् ।
राजीनामा नदिएपछि मुख्यमन्त्री राउतले मंगलबार उनलाई बर्खास्त नै गरिदिएका हुन् । उनी प्रदेश सरकार स्थापनाको समयमै तत्कालीन राष्ट्रिय जनता पार्टी नेपाल (राजपा) बाट महेन्द्र राय यादवको कोटामा मन्त्री बनेका थिए ।
जसपामा विवादका बेला उनी महन्त ठाकुर पक्षको कित्ता फेरेर मन्त्री पद जोगाएका थिए । तर, अहिले आएर किन र प्रमुख सत्तारुढ दलकै नेता भएपनि कसरी उनलाई पदमुक्त गरियो भन्ने बहस राजनीतिक वृत्तमा भइराखेको छ ।
श्रोतका अनुसार, उनलाई अहिलेको संघ सरकारमा कृषि तथा पशुपंक्षी मन्त्री रहेका महेन्द्रकै सहमतिमा बर्खास्त गरिएको छ ।
प्रधानमन्त्री शेरबहादुर देउवाले पछिल्लोपटक मन्त्रीपरिषद् विस्तार गर्दा जसपा सांसद प्रमोद साहको नाम हटाएर अन्त्यमा उनको नाम राखिएको थियो ।
त्यही बेला महेन्द्रले आफूलाई मन्त्री दिने भए प्रदेशबाट आफ्नो कोटामा रहेका मन्त्री फिर्ता बोलाउने सहमति गरेको पार्टी श्रोतको भनाइ छ ।
अहिले आएर रामनरेशले राजीनामा नदिँदा महेन्द्रलाई नै मार्ग प्रशस्त गर्न दबाब आएपछि आफ्नो पद जोगाउन उनकै आग्रह र सहमतिमा रामनरेशलाई बर्खास्त गरिएको श्रोतले बतायो ।
मन्त्रीबाट हटाइएका रामनरेश यतिखेर महेन्द्रसँग आक्रोशित बनेका छन् ।
यता बर्खास्त भएका रायले महेन्द्र यादव मन्त्री बन्द आफुलाई हटाउने त्यस्तो कुनै भद्र सहमति नभएको बताउँदै त्यसमा कुनै सत्यता नरहेको बताए । उनले मुख्यमन्त्री राउतले मनपर्दी आफुलाई बर्खास्त गरेको प्रतिक्रिया दिए । अख्तियार मुख्यमन्त्री कर्यालयमा छापा मार्दा सरकारसंगै पार्टी पनि बद्नाम भएकोले राजिनामा दिएर मार्ग प्रसस्त गर्न आग्रह गर्दा मुख्यमन्त्री राउतले आफुलाई उल्टै बर्खास्त गरेको रायको तर्क छ ।
‘तीनदिन अघि मसहित केहि मन्त्री र मुख्यमन्त्रीको बीचमा छलफल भयो । एकीकृत समाजवादीलाई सरकारकमा ल्याउनु छ । मलाई राजिनामा दिनुस् भन्नु भयो । मैले मुख्यमन्त्रीजीलाई भने अख्तियारको छापाले सरकारसहित पार्टी पनि बद्नाम भएको छ । तपाई राजिनामा दिएर मार्ग प्रसस्त गर्नुस् ‘, रायले टुडेपाटीसंग भने ‘मिडियामा यस्तै प्रतिक्रिया दिए । रिसमा मलाई नै बर्खास्त गर्नु भो । उहाँसंग बर्खास्त गर्ने अधिकार छ । तर पार्टी भित्र पनि यसको विषयमा छलफल हुनुपथ्र्यो । केहि गर्नु भएन । मनमर्जी गर्नु भो । यो जवाफ पार्टीमा दिनुपर्छ ।’
