वीरगञ्ज । घटना संकास्पद देखिएपछि वीरगञ्जमा दाहसंस्कार गर्न लागिएको युवतीको शव प्रहरीले नियन्त्रमा लिएको छ ।
भारत घर भएकी अन्दाजी १९ वर्षीया जयुनत खातुनको शव प्रहरीले नियन्त्रणमा लिएर नारायणी अस्पतालमा शवको लागि पोस्टमार्टमको लागि पठाएको हो ।
घटनापछि जगरनाथपुर गाउँपालिकाका अध्यक्ष जालिम मियाँको परिवारका एक सदस्यलाई पनि प्रहरीले नियन्त्रणमा लिएको छ ।
जबर्जस्ती करणीपछि अत्यधिक रक्तस्राव भएको र उपचारका क्रममा मृत्यु भएकोले घटना लुकाउन हतारमा शव गाड्न खोजेको भन्ने सूचनाको आधारमा शव नियन्त्रणमा लिएको जिल्ला प्रहरी कार्यालय पर्साका प्रमुख प्रहरी उपरीक्षक बेलबहादुर पाण्डेले जानकारी दिए ।
परिवारका सदस्यले भने युवतीको शरीरमा देखिएको दादको उपचार गर्ने क्रममा दिइएको औषधिका कारण समस्या भएको बताएका छन् । भारतको बेतिया लगेर दादको उपचार गराउँदा चलाएको औषधि खाएपछि जिउ सुन्निएको र रक्तस्राव भएको उनीहरूको तर्क छ ।
घटनाबारे अनुसन्धान भइरहेको प्रहरीले जनाएको छ ।
