सर्लाही । सर्लाहीमा लागूऔषध गाँजा दुईजना भारतीय नागरिक पक्राउ परेका छन् ।
पक्राउ पर्नेमा भारतको बिहार राज्य अन्तर्गत सोनबर्षा ३ का २१ बर्षीय धर्मेन्द्र मण्डल र वडा नम्बर १ का १९ बर्षीय भोलाकुमार साह रहेका छन् ।
दुवैजनालाई सदरमुकाम मलगंवाबाट भारततर्फ गाँजा लैजाँदै गरेको अवस्थामा पक्राउ गरेको सर्लाही प्रहरीका प्रबक्ता एवं डीएसपी माधव प्रसाद बुढाथोकीले जानकारी दिए ।
उनका अनुसार दुबैजनालाई भारतको सोनबर्षातर्फ टाउकोमा पोका बनाएर लैजाँदै गर्दा नेपाल प्रहरी तथा सशस्त्र प्रहरीको संयुक्त टोलीले नियन्त्रणमा लिएको छ ।
पक्राउ परेका दुवैले बोकेको पोकाबाट ७० किलो गाँजा बरामद भएको बुढाथोकीले बताए ।
‘४-५ जना टाउकोमा पोका बोकेर गइरहेका थिए’ बुढाथोकीले भने, ‘प्रहरीलाई देख्नेवित्तिकै उनीहरु भागेका थिए । उनीहरुमध्ये दुईजनालाई पक्राउ गरिएको छ ।’
दुबैबिरुद्ध लागूऔषध गाँजा सम्बन्धी कसुर मुद्दा दर्ता गरी अन्य अनुसन्धान प्रक्रिया अगाडि बढाइएको उनको भनाइ छ ।
