शेयर बजारमा प्रवेश गर्नु अघि के जान्नुपर्छ? लहानको जे.एस.क्याम्पसमा विद्यार्थीहरूलाई प्रशिक्षण

महेश सिंह लहान – पछिल्लो समय युवा पुस्तामा शेयर बजारप्रति चासो बढ्दै गएको छ। तर, वित्तीय ज्ञानको अभावकै कारण धेरैले हतारमा लगानी गर्ने र नोक्सानी बेहोर्नुपर्ने अवस्था सिर्जना भइरहेको छ। यही समस्या समाधान गर्न दिपशिखा धितोपत्र कारोबार कम्पनी, स्टक ब्रोकर नम्बर ३८, लहान शाखाले जे एस मुरारका बहुमुखी क्याम्पस, लहानमा शेयर बजार सचेतना कार्यक्रम सम्पन्न गरेको छ।
ग्लोबल मनी वीक २०२५ को अवसरमा आयोजित कार्यक्रममा करिब २०० विद्यार्थी सहभागी भएका थिए। उनीहरूलाई शेयर बजारको परिचय, लगानी रणनीति, बजार विश्लेषण, जोखिम व्यवस्थापन लगायतका विषयमा जानकारी दिइयो।
कार्यक्रममा लहान शाखाका प्रबन्धक शिवानन्द चौधरी ले नेपाल धितोपत्र बजारबारे जानकारी दिँदै भने, “लगानी अघि अध्ययन, अनुसन्धान र बजारको सूक्ष्म विश्लेषण गर्न जरुरी छ। नत्र हल्लाको भरमा लगानी गर्दा ठूलो नोक्सानी हुन सक्छ।”
हाल नेपालमा धेरै युवा शेयर बजारप्रति आकर्षित भएका छन्। तर, अधिकांशले बजारको वास्तविक संरचना नबुझी हल्लाको भरमा लगानी गर्ने प्रवृत्ति देखिएको छ।
कार्यक्रममा सहभागी विद्यार्थी अभिषेक यादव भन्छन्, “हामीमध्ये धेरैलाई बजार कसरी चल्छ भन्ने आधारभूत जानकारी नै थिएन। अहिले आएर सही लगानी रणनीति बुझ्न पाएँ।”
दिपशिखा धितोपत्र कारोबार कम्पनीले हरेक शुक्रबार निःशुल्क शेयर तालिम सञ्चालन गर्दै आएको छ। यस तालिममा बजार विश्लेषण, सही शेयर छनोट गर्ने तरिका, कम्पनीको वित्तीय विवरण बुझ्ने सीप, तथा जोखिम व्यवस्थापनका उपायहरूबारे प्रशिक्षण दिइन्छ।
नेपालभर ६ शाखा मार्फत सेवा दिइरहेको दिपशिखा धितोपत्र कारोबार कम्पनीले नयाँ लगानीकर्तालाई सचेत बनाउन निरन्तर प्रयास गरिरहेको छ।
कम्पनीका अध्यक्ष दिपक राज ओली भन्छन्, “सूचित लगानीकर्ता बिना शेयर बजार दिगो विकास सम्भव छैन। त्यसैले हामी निरन्तर सचेतना अभियान चलाइरहेका छौं।”
विश्लेषकहरू भन्छन्, शेयर बजारप्रति युवाहरूको चासो सकारात्मक भए पनि, सही जानकारी बिना लगानी गर्दा जोखिम उच्च हुन्छ। यस्ता सचेतना कार्यक्रमहरू प्रभावकारी भएमा मात्र नेपालको शेयर बजार व्यवस्थित हुने आशा गर्न सकिन्छ।