लहान – संस्थागत विद्यालय संगठन मिर्चैयाको आयोजनामा सोमबार सम्पन्न अन्तरविद्यालय हाजिरीजवाफ प्रतियोगिताले शिक्षा क्षेत्रमा सुधारको आवश्यकता औंल्याएको छ। प्रतियोगितामा प्याब्सन सिरहा का अध्यक्ष उमेश चौधरी र उपाध्यक्ष उमेश यादवलाई योगदानका लागि सम्मान गरिएको थियो।
प्रतियोगितामा सहभागी विद्यार्थी र शिक्षकहरूले आफ्नो उत्कृष्ट प्रदर्शन गर्दै शिक्षामा सिर्जनशीलता र प्रतिस्पर्धात्मक क्षमताको विकासलाई प्राथमिकता दिनुपर्ने आवश्यकता औंल्याएका थिए। कार्यक्रममा अध्यक्ष चौधरीले शिक्षामा गुणस्तर सुधार र समावेशी पहुँचलाई अझ प्रभावकारी बनाउनुपर्नेमा जोड दिँदै भने, “शिक्षा क्षेत्रमा देखिएका कमी-कमजोरी हटाउन र सुधारका कदम चाँडै अघि बढाउन सबै पक्ष एकजुट हुनुपर्छ।”
आयोजक समितिका अध्यक्षले संस्थागत विद्यालयहरूको वर्तमान अवस्थाबारे समीक्षा गर्दै विद्यालयहरूलाई गुणस्तरीय शिक्षाका लागि प्रेरित गर्न यस्ता कार्यक्रम महत्वपूर्ण हुने बताए। “विद्यालयहरूले शिक्षण पद्धतिमा नवीनता ल्याउन आवश्यक छ। शिक्षामा देखिएको व्यापारिक सोचलाई हटाएर गुणस्तर र नैतिक शिक्षामा ध्यान दिनुपर्ने समय आएको छ,” उनले भने।
प्रतियोगितामा विजयी विद्यालयलाई सम्मान प्रदान गरिँदा शिक्षक तथा अभिभावकहरूमा पनि उत्साह थपिएको थियो। सहभागीहरूले यस्तो खालका प्रतिस्पर्धाले विद्यार्थीको बौद्धिक विकास र नेतृत्वदायी क्षमताको वृद्धि हुनेमा विश्वास व्यक्त गरे।
शिक्षा सुधारका लागि सार्वजनिक र निजी क्षेत्रबीचको सहकार्यलाई अझ बलियो बनाउने प्रतिबद्धता जनाउँदै आयोजकहरूले आगामी दिनमा पनि यस्ता कार्यक्रमलाई निरन्तरता दिने घोषणा गरेका छन्।
