खैबर । तोरखाम नाका लामो समयदेखि बन्द गरेको विरोधमा लण्डी कोटलमा हजारौँ राजनीतिक कार्यकर्ता, यातायात व्यवसायी, व्यापारी, भन्सार क्लियरिङ एजेन्ट, मजदुर र स्थानीय संघसंस्थाका प्रतिनिधिले विरोध प्रदर्शन गरेका छन्।
बाचाखान चोकमा भएको प्रदर्शनलाई मिराजुद्दीन, मुक्तदिर शाह, शाहिद शिनवारी, वली मोहम्मद, कारी नाजिमगुल, अफताब अहमदलगायतले सम्बोधन गरेका थिए। उनीहरुले तोरखाम नाका बन्द गर्नुलाई द्विपक्षीय व्यापार र अन्य रोजगारीमा आबद्ध जनताको आर्थिक हत्या भएको बताए।
साताव्यापी नाका बन्द हुँदा सयौं गरिब मजदुर र दैनिक ज्यालादारी गर्नेहरू आफ्नो आम्दानीको एक मात्र स्रोतबाट वञ्चित हुँदा परिवारलाई भोकमरीको सामना गर्नुपरेको उनीहरूले बताएका छन्। दैनिक उपभोग्य वस्तुको मूल्यवृद्धिले मजदुर मर्कामा परेको उनीहरुले बताएका छन्।
सीमा नाका बन्द हुँदा दुवैतर्फका व्यापारी तथा यातायात व्यवसायीलाई ठूलो आर्थिक नोक्सान हुनुका साथै पाकिस्तान र अफगानिस्तानका सर्वसाधारणको पैदल आवतजावतमा समेत नराम्ररी असर परेको बताए।
पछिल्लो आठ दिनदेखि असहनीय गर्मीमा दुवैतर्फका सयौं वृद्ध, विरामी, महिला र बालबालिका सीमा नाका खोल्न अधीर भएर पर्खिरहेका उनीहरुले बताए।
यस्ता घटनाले दुई छिमेकी मुलुकबीचको सम्बन्धमा नराम्रो असर पुर्याउने भएकाले सीमा सुरक्षा समस्याको वार्ताबाटै समाधान खोज्न दुवै देशका नेताहरुलाई उनीहरुले आग्रह गरेका छन्।
तोरखाम नाकामा शान्ति र व्यापारिक गतिविधि सुचारु होस् भन्ने नाराका बीच वक्ताले दुई दिनभित्र सीमा नाका नखुल्ने जिरो प्वाइन्टमा अनिश्चितकालीन धर्ना दिने बताएका छन्।
यसैबीच, खुदाई खिदमतगरको लन्डी कोटल शाखा र अवामी नेशनल पार्टीले बुधबार लन्डी कोटलमा अलपत्र परेका अफगानीहरूलाई खाना वितरण गरेको छ।
