एचआईभी रोकथाम र उपचारमा प्रभावकारिता ल्याउने उद्देश्यले जनकपुरधाममा सरोकारवाला सरकारी तथा गैरसरकारी संघ संस्थाहरूको समन्वय बैठक सम्पन्न भएको छ ।
धनुषामा सञ्चालित समुदायको नेतृत्वको आधारमा गरिने अनुगमन कार्यक्रम सिएलएम अन्तरगत आइतबार स्पर्श नेपालको कार्यालयमा को–क्रिएसन सहनिर्माण बैठक सम्पन्न भएको हो । यु एन एड्सको सहयोगमा स्पर्श नेपालद्वारा सञ्चालित समुदायको नेतृत्वको आधारमा गरिने अनुगमन कार्यक्रम सिएलएम का धनुषा फोकल पर्सन कुलदिप साहले बैठकमा सहजीकरण गरेका थिए ।
उनले, सिएलएम अन्तर्गत अहिले सम्म भएका कार्यक्रमहरूका बारेमा सहभागीहरूलाई जानकारी गराउँदै, कार्य क्षेत्रमा भोगेका विभिन्न समस्या र सर्भेको क्रममा त्यहाँ प्राप्त विवरणहरूलाई बैठकमा प्रष्ट्याएका थिए ।
साहका अनुसार एफएसडब्लु, पिडब्लुआइडी, पिएलएचआइभी, टिजी समुदायबाट ५४० जना सेवाग्राहीबाट गरिएको सर्वेक्षणबाट आएको समस्याहरु मुख्यरुपमा एचआइभी लागेका व्यक्तिलाई कहिलेकाँही चिकित्सकबाट उपचार गर्न नमानेको, टाढाबाट आउने सेवाग्राहीहरुको हकमा यातायात खर्च उपलब्ध गराउनुपर्ने, भाइरल लोड चेकजाँचको रिपोर्ट समयमा नआइरहेको समस्याहरु आइरहेको छ । एचआईभी रोकथाम र उपचारमा प्रभावकारिता ल्याउन भइरहेका प्रयासका बारेमा सहभागीहरूबीच सुझाव आदानप्रदान सहित अन्तक्रियात्मक ढंगले गरिएको बैठकमा आगामी दिनमा सुधारका लागि गर्न सकिने कार्यहरूका बारेमा पनि छलफल केन्द्रित गरिएको थियो ।
पिडब्लुआइडीका सेवाग्राहीहरुबाट ओएसटी सर्भिस सुचारु हुनुपर्ने माग गरे । सम्बन्धित निकायका प्रतिनिधिहरुले उनीहरुको समस्या समाधानका लागि पहल गर्ने बताए ।
जिल्ला समन्वय समितिका अध्यक्ष राजनन्दन मण्डलको अध्यक्षतामा भएको बैठकमा राष्ट्रिय मानव अधिकार आयोग जनकपुरधामका अधिकृत रेखा दत्त, प्रादेशिक अस्पताल जनकपुरका एआरटी काउन्सलर जितेन्द्र यादव, सेभ द चिल्ड्रेनको सिनियर प्रोग्राम कोर्डिनेटर चन्द्रनारायण साह, नेपाल रेडक्रस सोसाइटीका सभापति नरेशप्रसाद सिंह, स्पर्श नेपालका मनोज कर्ण, विरेन्द्र चौधरी, जिल्ला युवा सञ्जालकी कोषाध्यक्ष खुश्वु साह, जनकपुरधाम उप महानगरपालिकाका स्वास्थ्य शाखाका प्रतिनिधिलगायत विभिन्न विभिन्न संघ संस्थाका प्रतिनिधिहरुको उपस्थिति रहेको थियो ।
