काठमाडौं । माओवादी अध्यक्ष एवं प्रधानमन्त्री प्रचण्ड र एमाले अध्यक्ष केपी शर्मा ओलीबीच खटपट भएको खुलेको छ । खटपट बढेर चेतावनीको तहमा पुगेको छ । राष्ट्रपतिको निर्वाचन नजिकिँदै गर्दा ओली र प्रचण्डबीच दिनहुँ भेट भइरहेको छ ।
जति भेट बढिरहेको छ, त्यति नै अविश्वास बढिरहेको छ । कहिले ओली बालुवाटार आउने त कहिले प्रचण्ड बालकोट जाने श्रृंखला चलिरहेको छ । यसैक्रममा शुक्रबार प्रचण्ड बालकोट पुगेका थिए । बालकोटमा करिब दुई घण्टा वार्ता तिक्ततापूर्ण रहेको प्रधानमन्त्रीको सचिवालयका सदस्यले बताएका छन् । ओलीले राष्ट्रपतिमा एमालेले जसलाई उठाउँछ, उसलाई दायाँबायाँ नभनी माओवादीले समर्थन गरेर निर्वाचित गराउनुपर्ने अडान राखेका थिए । तर प्रचण्डले राष्ट्रिय सहमति आवश्यक भएको, कांग्रेसले पनि विश्वासको मत दिएको, विगतमा दलबाट राष्ट्रपति बनाउँदा संविधानभन्दा दलीय आधारमा चलेकाले सर्वस्वीकार्य उम्मेदवारलाई मात्र समर्थन गर्न सकिने धारणा राखे ।
ओलीले १० पुसमा एमालेले पाउने भनि भएको सहमति पटक पटक कोट्याउँदै माओवादीलाई शर्त राख्ने अधिकार नभएको चेतावनी दिएका थिए । राष्ट्रिय सहमतिको नाममा शर्त राखेर कांग्रेससँग मिल्ने र पाँच वर्ष सरकार चलाउने सपना देख्न नहुने उनको भनाइ थियो । चेतावनीकै भाषामा ओलीले तेस्रो दल भएर पाँचै वर्ष सरकार चलाउँछु भन्ने नठान्न सचेत गराए ।
एमालेले उठाएको व्यक्तिलाई समर्थन गर्ने पुस १० को सहमतिबाट पछि हटे सम्झौता भंग हुने र त्यसपछि परिस्थिति अर्कै बन्ने चेतावनी ओलीको थियो । ओलीको चेतावनीपछि प्रचण्डले राष्ट्रिय सहमतिमै अघि बढ्नुपर्ने अडान राखेर विदा मागेका थिए । तर रिसाएका ओलीले विदासमेत नगरेको बालुवाटारका एक पदाधिकारीले बताए । ‘हिजोको सम्वाद तनावपूर्ण नै भयो ।
प्रधानमन्त्रीज्यूले अवस्थालाई सम्हालेर निस्किनुभयो । उताको धम्की खपिनसक्नुकै थियो,’ उनले भने, ‘बाहिर आएर पनि प्रधानमन्त्रीज्यूले गठबन्धन जोगाउने स्पिरिटमै पत्रकारलाई प्रतिक्रिया दिनुभयो । तर बालकोट आफ्नो हठमा बसेर गठबन्धन टुटाउन बाध्य पार्दैछ ।’ ओलीले पनि सार्वजनिक रुपामा ‘मिसन ग्रासरुट’ अभियान उद्घाटनका क्रममा गठबन्धनमा समस्या आएको संकेत गरेका छन् । परिस्थितिले नयाँ चक्रव्यूहतिर धकेल्न खोजेको उनको भनाइ थियो । नेपालपाना
