काठमाडौं । नेपाली कांग्रेसका प्रभावशाली नेता एवं विपीपुत्र शशांक कोइरालाले संसदीय दलको नेतामा पार्टी सभापति एवं प्रधानमन्त्री शेरबहादुर देउवालाई समर्थन गर्ने घोषणा गरेका छन् ।
कांग्रेस पूर्वमहामन्त्री एवं नवनिर्वाचित सांसद कोइरालाले देउवालाई जहिले पनि आफ्नो सहयोग रहने बताए । संसदीय दलमा र सत्ताको नेतृत्वमा देउवाको विकल्प नभएको उनको भनाइ छ । सबैसँग सहजै डिल गर्नसक्ने, परामर्श गरेर सहमतिमा ल्याउन सक्ने विश्वासिलो पात्र देउवा भएकाले सबैको रोजाइमा रहेको कोइरालाले बताए । राजनीतिमा देउवा पोख्त र रणनीतिमा बेग्लै क्षमता रहेको उनको बुझाई छ ।
शशांकले पाको, अनुभवी र सबैलाई विश्वासमा लिन सक्ने सभापति देउवासँग महामन्त्री गगन थापा टिक्नै नसक्ने जिकिर गरे । गगनलाई अहिले गाह्रो अवस्था रहेको र लड्छु भनेरमात्र नहुने भन्दै उनले सचेत गराए । देउवासँग गगनले फेस गर्नै नसक्ने र यो एकदमै गाह्रो रहेको कोइरालाको भनाइ छ ।
संसदीय दलमा देउवा नै बहुमतमा रहेको भन्दै शशांकले अरुको सम्भावना नरहेको पनि प्रष्ट पारे । अब देउवाकै नेतृत्वमा एकढिक्का भएर अगाडि बढ्नुपर्ने उनको सुझाव छ ।
