काठमाडौं । नेकपा माओवादी केन्द्रले गठबन्धनलाई निरन्तरता दिँदै सरकार बनाउने निर्णय गरेको छ । निर्वाचनमा मूलभूत रूपमा गठबन्धन सफल भएको निष्कर्ष निकाल्दै पार्टी केन्द्रीय कार्यालय पेरिसडाँडामा बसेको पदाधिकारी बैठकले गठबन्धनकै सरकार बनाउने निर्णय गरेको हो ।
‘निर्वाचनबाट कतिपय सन्दर्भमा अपेक्षाकृत परिणाम नआए पनि मूलभूत रूपमा सफल र परिणाममुखी भएको छ,’ महासचिव देव गुरुङले भने, ‘निर्वाचनमा थोरै तलमाथि त हुन सक्छ । यसलाई स्वीकार गरेर अगाडि बढ्नुपर्छ ।’ माओवादीले वर्तमान सत्तागठबन्धनसँगै मिलेर नयाँ सरकार गठन गर्न प्रयास गर्ने पनि निर्णय गरेको छ ।
बैठकपछि सञ्चारकर्मीसँग कुरा गर्दै महासचिव गुरुङले बैठकमा निर्वाचनको समीक्षा र सरकारबारे सामान्य छलफल भएको जानकारी दिए । उनले अहिलेकै गठबन्धनबाट नयाँ सरकार बनाउने पहिलो प्रयास रहने पनि बताए । ‘अहिलेको गठबन्धनलाई तोड्ने वा फोड्ने कुरा भएको छैन । आपसी समझदारीलाई जोड दिने हो । अहिलेको गठबन्धनको विकल्पबारे सोचेका छैनौँ,’ गुरूङले भने, ‘गठबन्धनको बैठक गरेर समीक्षा गर्छौं ।’ गुरूङका अनुसार सत्तागठबन्धनमा रहेका दलहरूको बैठक सोमबार बस्ने तय भएको छ । उक्त बैठकमा चुनावी समीक्षा र नयाँ सरकारबारे छलफल हुनेछ ।
