वीरगञ्ज । मधेश प्रदेशको एक मात्र महानगरपालिका वीरगञ्जका मेयर विजय सरावगी नेकपा एमालेमा प्रवेश गरेका हुन् ।
एमालेका केन्द्रीय अध्यक्ष एवं पूर्व प्रधानमन्त्री केपी शर्मा ओलीले वीरगञ्ज आएर मेयर सरावगीलाई पार्टीमा प्रवेश गराएका हुन् ।
एमाले प्रवेश गर्दै मेयर सरावगीले जसपा जातिवादी भएको आरोप लगाएका हुन् । एमाले प्रवेश गर्दै मेयर सरावगीले भने, ‘जसपाबाट मैले छोड्ने कारणहरु छन् । त्यो सबैलाई थाहा छ, आम जनतालाई थाहा छ, एउटा राम्रो मान्छेलाई पार्टीले टिकाएर राख्न सकेन ।’
मेयर सरावगीले जसपाले अहिले पनि जातिवादकै राजनीति गरिरहेको टिप्पणी गरे । उनले भने, ‘अहिले पनि जातिवादकै राजनीति भइरहेको छ । जातिवादको राजनीति गरेर राष्ट्रिय पार्टी हुन सकिदैन । राष्ट्रिय पार्टी भनेको हाम्रो एमाले पार्टी नै हुन सक्छ ।’
२०७४ सालको स्थानीय तहको निर्वाचनमा सरावगी तत्कालिन संघीय समाजवादी फोरमबाट मेयरमा निर्वाचित भएका थिए ।
एमाले अध्यक्ष ओलीसँग आफू सुरुदेखि नै प्रभावित भएको भन्दै मेयर सरावगीले ओली जत्तिको बोल्ड डिसिजन गर्न सक्ने नेता अरु नभएको बताए ।
