शम्भु श्रेष्ठ दलाई लामाका दूत, आजकाल चिनियाँ गाडी बेच्दै

काठमाडौं । केही समय अगाडि नेकपा (एकीकृत समाजवादी) निकटका पत्रकारहरूको संगठनको संयोजक बनेका शम्भु श्रेष्ठ तिब्बतका धर्मगुरु दलाई लामाको विशेष दूत रहेको विषयफेरि चर्चामा आएको छ ।

विगतमा श्रेष्ठभन्दा जुनियर गोकुल बास्कोटाहरू एमालेको केन्द्रीय सदस्य हुनु र श्रेष्ठ केन्द्रीय सदस्य हुन नपाउनुको पछाडि चिनियाँ दूतावासले केपी ओली र माधव नेपाललाई भेटेर श्रेष्ठले सुटुक्क दलाई लामालाई भेटेको विषयमा गम्भीर रुपमा ध्यानाकर्षण गराएपछि पत्ता काटिएको छ ।

श्रेष्ठ एमाले छाडेर माधव नेपालको पार्टीतिर छन् । श्रेष्ठका विषयमा फेरि दलाई लामाको प्रतिनिधि भनेर माधव नेपालको पार्टीभित्र चर्चा भएको छ । त्यति मात्र होइन २०६२÷६३ को आन्दोलनताका शम्भु श्रेष्ठले राजदरबारबाट रु. ५० हजार बुझेर दस्तखत गरेको विषयले पनि चर्चा पाउन थालेको छ ।

यस विषयमा प्रेस चौतारी नेपालले छानविन गर्ने क्रममा अख्तियार दुरुपयोग अनुसनधान आयोगमा निवेदन दिएर दस्तखत बारे बुझ–बुझारथ हुँदा श्रेष्ठले दस्तखत गरेर रु.५० हजार बुझेको कुरा प्रमाणित नै भएको थियो ।

कम्युनिस्टको खोल ओढेका दृष्टि साप्ताहिकका सम्पादक समेत रहेका श्रेष्ठले राजदरबारलाई सहयोग गरे वापत नै त्यस बेला रु.५० हजारको दरबारको हण्डी लिएको कुरा बाहिर आएपछि ओलीले श्रेष्ठलाई पार्टी र सरकारका कुनै पनि स्थानमा ठाउँ दिएका थिएनन् ।

गणतन्त्र आएपछि तत्कालीन भारत सरकारले ठूलो संख्यामा नेपाल सरकारलाई भारतीय उत्पादनको गाडी महिन्द्रा दिने निर्णय गरेको थियो । श्रेष्ठले पूर्वराजा ज्ञानेन्द्र शाह तथा प्रभाकरशम्शेर राणाको सिप्रदीको एजेन्टका रुपमा काम गरेर महिन्द्राको साटो टाटाको गाडी ल्याउनुपर्छ भनेर सिप्रदीको एजेन्ट बनेर फायल बोकी नेपाल सरकारको गृह मन्त्रालय र परराष्ट्र मन्त्रालयमा दौडेका थिए ।

त्यो देख्दा मान्छेहरू कस्ता–कस्ता कम्युनिस्ट पत्रकार भनेर जिब्रो टोकेका थिए । हिजोआज भने ‘बीओआईडी’ भन्ने चिनियाँ इलेक्ट्रोनिक्स बस कम्पनीका एजेन्ट प्रसिद्धबहादुर पाण्डेको पनि एजेन्ट बनेर विभिन्न मन्त्रालयहरू चाहारीरहेको स्रोतले जनाएको छ । उनीलाई माधव नेपालको पार्टीका पत्रकारहरूको संयोजक हो कि गाडी बेचुवा एजेन्टका दलाल हुन् भनेर प्रश्न उठेको छ । नेपाल पाना