रञ्जन भण्डारी-
महोत्तरी । महोत्तरीमा महिलाबाटै समेत महिला पीडित भएको प्रदेश सांसद शारदा थापाले बताएकी छन् । महिला हिंसा विरुद्धको १६ दिने अभियान अन्तर्गत महोत्तरीमा निकालिएको प्रभातफेरी पश्चात जिल्ला समन्वय समितिको सभाहलमा भएको कार्यक्रममा थापाले सो कुरा बताएकी हुन् ।
पुरुषबाट हिंसा र पीडा पाइरहेका महिलाहरु केहि हदसम्म महिलाबाटै समेत पीडित हुुनु परेको उनको भनाइ छ । परिवारमा सासुबाट बुहारी,बुहारीबाट सासु, भाउजूबाट नन्द र नन्दबाट भाउजू पिडित हुनु परेको घटनाहरु समेत देखिने गरिएको सांसद थापाले बताइन् ।
श्रीमानबाट श्रीमती,ससुराबाट बुहारी, देवरबाट भाउजू पीडित जस्ता घटनाहरु भइरहदा महिलाबाटै समेत महिला पीडित हुुनु दुर्भाग्यपुर्ण भएको भन्दै उनले महिला हिंसा विरुद्धको १६ दिने अभियानको यस वर्षको देशव्यापी नारा “घरैबाट सुरु गरौ, महिला हिंसा अन्त्य गरौ” भन्ने नारालाई चरितार्थ गर्न आजबाटै प्रतिवद्धता जनाउन आग्रह गरिन् ।
राष्ट्रिय महिला आयोगको आयोजन र ओरेक नेपाल, टिपिओ नेपाल, महिला सचेतना समूण्ह,ईन्सेक लगायतका महोत्तरी स्थित विभिन्न संघसंस्थाको सह आयोजनमा भएको उक्त कार्यक्रममा अध्यक्षता गर्दै राष्ट्रिय महिला आयोगकी सदस्य जया घिमिरेले महोत्तरीमा बिगत केहि समय भित्रै महिला विरुद्धको विभिन्न जघन्य अपराध घटनाहरु घटेको पाइएको बताइन् ।
उनले सबै निकाय यसप्रति गम्भीर भई यस्ता घटनाहरु पुनः हुन नदिन र भएका घटनाहरुमा समेत कडाइका साथ अपराधीहरुलाई कानुनी कठघरामा ल्याउन सचेत गराइन् । उनले बोक्सी आरोपमा महिलाको हत्या, मलमुत्र खुवाइएको, कुटपिट गरिएको घटनाहरु तथा नाबालिकहरुलाई समेत बलात्कार गरिएको घटनाहरुमा राष्ट्रिय महिला आयोगको गम्भीर ध्यानाकर्षण भएको बताइन् ।
आफुहरु पिडितहरुको घर घरमै पुग्दा उनीहरुको असह्य पीडा देखेकोले यस्ता घटनाहरुका दोषीहरुले उन्मुक्ति नपाउने उनको भनाइ छ ।
उनले जघन्य प्रकृतिका घटनाहरुमा दोषीलाई धरौटीमा छाडिदा पिीडित माथि अन्याय हुन सक्ने भएकोले यसप्रति सबै पक्ष गम्भीर हुनु पर्ने बताइन् ।
कार्यक्रममा महिला अधिकारकर्मी गुञ्जा रायले बिगतका विभिन्न महिला विरुद्धको घटनाहरुलाई सम्झदै केहि घटनामा प्रहरीबाट समेत कमिकमजोरीहरु भएको देखिएकोले प्रहरीलाई पीडकको नभइ पीडितको हुन आग्रह गरिन् ।
कार्यक्रममा प्रदेशसभा सदस्यहरु, विभिन्न पालिकाका अध्यक्ष,प्रमुख,उपाध्यक्ष,उपप्रमुख,जिल्ला समन्वय समिति प्रमुख, प्रमुख जिल्ला अधिकारी,सुरक्षा निकाय प्रमुखहरु तथा विभिन्न संघसंगठनका प्रतिनिधी तथा प्रमुखका साथै विद्यार्थी, शिक्षकका साथै सयौको संख्यामा सर्वसाधारणहरुको उपस्थिति रहेको थियो ।
