काठमाडौैं । उच्च शिक्षा हासिल गर्नका लागि विश्वको एक उत्कृष्ट गन्तव्य रहेको बेलायतमा अन्तर्राष्ट्रिय नर्सिङ्ग विषयको अध्ययन र रोजगारीका धेरै अवसरहरु रहेका छन् | सीपमूलक शिक्षा पद्धति, विश्व मान्यताप्राप्त डिग्री र संसारको जुनसुकै कुनामा सजिलै रोजगारी पाइने भएकाले नर्सिङ्ग विषय अध्ययन गर्न चाहने विद्यार्थीहरुको हकमा बेलायत एक उत्कृष्ट रोजाइ हो | कोरोना महामारीपछि बढ्दो आकर्षण भएको यो विषयमा बेलायती विश्वविद्यालयमा आवेदन दिने विद्यार्थीको संख्या बढेको छ । युनिभर्सिटी एड्मिसन्स सर्भिस (युकास) को तथ्यांकअनुसार नर्सिङ्ग पढ्न आवेदन दिनेको संख्या ३२ प्रतिशतले वृद्धि भएको हो जसमा अन्तर्राष्ट्रिय साथै बेलायती विद्यार्थीहरु पनि पर्दछन् |
नर्सिङ्ग टाइम्सका अनुसार बेलायतमा नर्सिङ्ग शिक्षाका लागि विश्वकै सर्वोत्तम विश्वविद्यालय जस्तै एडिनबरा विश्वविद्यालय, लिभरपुल विश्वविद्यालय, बर्मिन्घम विश्वविद्यालय आदि विश्वविद्यालयहरु रहेका छन् र करीब ११४ शैक्षिक संस्थाहरुले नर्सिङ्ग विषय सम्बन्धी शिक्षा तथा तालिमहरु दिदै आएका छन् | बेलायतमा स्नातक तहमा नर्सिङ्ग विषय साधारणतया ४ वर्षको हुन्छ, जसमा ४ मुख्य विधा: अडल्ट, चिल्ड्रेन, लर्निङ्ग डिस्एविलिटी र मेन्टल हेल्थ मध्ये कुनै एकमा विशेषज्ञता हासिल गरी आफ्नो भविष्यको वृत्ति (करियर) विकास गर्न सकिन्छ | वार्षिक ट्युसन फी £ १३,५०० बाट सुरु हुने यस विषयमा अध्ययन साथै तालिमका लागि थुप्रै छात्रवृत्तिको व्यवस्था पनि छ |
नेपालबाट सामान्यता बीएससी एडल्ट नर्सिङ, बीएससी नर्सिङ, एमएससी नर्सिङलगायतका कोर्समा विद्यार्थीहरु बेलायत जाने गरेका छन् | बेलायतमा विश्वविद्यालयहरूले तीन वर्षको ‘ब्याचलर डिग्री इन नर्सिङ वीथ एनएमसी रजिस्ट्रेसन कोर्स’ सञ्चालन गरेका हुन्छन् । नेपालबाट सर्टिफिकेट लेभल नर्सिङ पास गरेका र साइन्स पढेका विद्यार्थीले आवेदन दिन मिल्ने यो कोर्स सकेपछि विद्यार्थी यूकेकै योग्य नर्स हुन्छन् । बेलायतकै विश्वविद्यालयबाट तीन वर्षको ब्याचलर्स इन नर्सिङ गरिसकेपछि त्यही डिग्रीको आधारमा नर्सिङ एन्ड मिडवाइफरी काउन्सिल (एनएमसी) ले रजिस्टर्ड नर्सको पिन नम्बर (पर्सनल आइडेन्टीफिकेसन नम्बर) जारी गर्ने गर्छ ।
प्राप्त तथ्यांक अनुसार बेलायतमा ९४% नर्सहरुले अध्ययन सकेको ६ महिनामा नै रोजगारी पाउने गरेका छन् जसले गर्दा यो रोजगारीमूलक विषय पनि हो | अहिले बेलायतको स्वास्थ्य क्षेत्रमा नर्सहरुको निकै अभाव रहेको छ | युकासका अनुसार सन् २०२० को अन्त्यमा ब्रेक्जिट अन्योल र विद्यार्थीलाई हुने सहयोग परिवर्तनका कारण ईयूमा आवद्ध मुलुकका विद्यार्थीमा बेलायत आउन विकर्षण भएको छ | ब्रेक्जिटका कारण युरोपेली मुलुकका नर्सहरू फर्कने क्रममा रहेकाले बेलायतमा नर्स अभावको दर बढ्ने चिन्ताबीच अवसर पनि बढेको छ । बेलायत सरकारले राष्ट्रिय स्वास्थ्य सेवा (एनएचएस) लाई ५० हजार नर्स उपलब्ध गराउने लक्ष्य राखेकोले नर्सिङ्ग पढ्ने र काम गर्न चाहनेका लागि यो सुनौलो अवसर हो | इंग्ल्यान्डमा स्वास्थ्य प्रणालीमा काम गर्ने स्वतन्त्र थिंक ट्यांक किंग्सफन्डका अनुसार बेलायतमा ३८ हजार नर्सिङ्ग वर्कफोर्सका लागि रोजगारीको अवसर छ भने ब्रिटिस मेडिकल एसोसिएसन (बीएमए) को तथ्यांकमा ८ हजारभन्दा बढी मेडिकल डाक्टरको अभाव छ | सोही अभावका कारण नर्सिङ्ग तथा स्वाथ्यक्षेत्रमा रोजगारीका अवसरहरु धेरै सिर्जना भएका छन् | कार्य क्षेत्रमा धेरै लचकता रहेको नर्सिङ्ग पेसामा रजिस्टर्ड नर्स भईसकेपछि सरकारी अथवा निजी क्षेत्रमा कार्यरत हुन पाइन्छ | बेलायतमा नर्सहरुको औसत सुरुवाती बार्षिक तलब £२२,००० देखि £ २८,००० सम्म हुन्छ | आम्दानीसंगै मर्यादित रहेको यो पेसामा धेरै भत्ता र अन्य सुबिधा सेवाहरु पनि छन् |
हालसालै बेलायत सरकारले अध्ययनपछि दुई वर्ष पूर्णकालीन रूपमा काम गर्न पाउने स्किम पोस्ट स्टडी वर्क (पीएसडब्लू) फेरि कार्यान्वयनमा ल्याएको छ | यस अन्तर्गत बेलायती विश्वविद्यालयबाट स्नातक वा माथिल्लो तह पूरा गर्ने अन्तर्राष्ट्रिय विद्यार्थीहरूले पढाइपछि कम्तीमा २ वर्षसम्म काम गर्न पाउनेछन् | पीएचडी पूरा गरेका विद्यार्थीहरूले भने तीन वर्ष काम गर्न पाउनेछन् । गत जुलाई १ तारिखदेखि ‘ग्य्राजुएट रुट’ मा भिसा आवेदन खुला भएको छ | अध्ययन पूरा गरिसकेपछि पनि अन्तर्राष्ट्रिय विद्यार्थीहरूले बेलायती समाज तथा अर्थतन्त्रमा योगदान गरून् भन्ने उद्देश्यले सरकारले यो स्किम ल्याएको हो । नयाँ रुटले बेलायतमा सन् २०३० सम्म उच्च शिक्षामा ६ लाख विदेशी विद्यार्थी पुर्याउने सरकारको ‘अन्तर्राष्ट्रिय शिक्षा रणनीति’ लक्ष्य हासिल गर्न सघाउने अपेक्षा गरिएको छ ।
तसर्थ, आफ्नो अर्थतन्त्रमा योगदान गर्न सक्ने उच्च दक्ष जनशक्ति (हाइली स्किल्ड) योजना ल्याउने तयारी गरिरहेको बेलायत सरकारको नीतिले नर्सिङ्ग जस्तै दक्ष जनशक्तिलाई सहज हुने भएको छ । त्यसमाथि अध्ययनपछि पाइने पोस्ट स्टडी वोर्क भिसा, न्यूनतम कागजात आवश्यकता, ब्रेक्जिट असर, क्षमतामा आधारित अध्यागमन नीति र जनशक्ति अभावका कारण बेलायत नर्सिङ्ग पढ्न र रोजगार पाउनको लागि उत्कृस्ट गन्तव्य बन्ने देखिन्छ |
