महेश सिंह, सिरहा (लहान) — महिला सामुदायिक स्वास्थ्य स्वयंसेविकाहरूको क्षमता अभिवृद्धि गर्ने उद्देश्यले लहान नगरपालिकाका विभिन्न वडामा सञ्चालन गरिएको एकदिने कुपोषण सम्बन्धी अभिमुखीकरण कार्यक्रम प्रभावकारी रूपमा सम्पन्न भएको छ। कार्यक्रम अन्तर्गत कडा तथा मध्यम शीघ्र कुपोषण (SAM/MAM) को स्क्रिनिङ, पहिचान तथा प्रेषणसम्बन्धी व्यवहारिक प्रशिक्षण प्रदान गरिएको थियो।
लहान–१९ छरापट्टीमा आयोजित कार्यक्रममा २५ जना स्वयंसेविकाको सहभागिता रहेको थियो। कार्यक्रममा गाढा स्वास्थ्य चौकीका इन्चार्ज बिरेन्द्र चौधरी तथा छरापट्टीका निमित्त इन्चार्ज कल्पना कुमारी यादवको उपस्थिति रहेको थियो भने पोषणसम्बन्धी सहजीकरण समेत गरिएको थियो।
त्यसैगरी लहान–२० मा आयोजित कार्यक्रममा दलित विकास मंचका पोषण सहजकर्ता एलिना कुमारी चौधरी, सहजकर्ता जितेन्द्र कुमार यादव, शम्भु सरदार, धर्मदेव साह र समुद्री यादवले सहजीकरण गरेका थिए। कार्यक्रममा सहभागीहरूलाई कुपोषणको पहिचान, MUAC टेप प्रयोगमार्फत मापन विधि तथा आवश्यक परामर्श र प्रेषण प्रक्रिया बारे जानकारी दिइएको थियो।
लहान–११ मा सम्पन्न कार्यक्रममा २७ जना सहभागी रहेका थिए। कार्यक्रममा राजेश्वर लाल कर्ण, अर्बिन्द कुमार चौधरी, प्रतिभा शर्मा तथा दलित विकास मंचकी पोषण सहकर्ता अनिता चौधरीको सक्रिय भूमिका रहेको थियो।
